Unudulmuş xəstəliklər qayıdır - ÜST-dən narahatlıq doğuran XƏBƏRDARLIQ

Ümumdünya Səhiyyə Təşkilatı (ÜST) dünyanın bir çox ölkəsində əhalinin vaksinasiya proqramlarının azalması ilə bağlı ciddi narahatlığını ifadə edib. Bildirilir ki, bu təşvişdoğuran tendensiya qızılca, meningit və sarı qızdırma kimi ölümcül xəstəliklərin yayılmasının artması fonunda müşahidə olunur.

Oxu.Az-ın verdiyi məlumata görə, bu barədə təşkilatın saytında yayılan bəyanatda qeyd edilib.

Bildirilib ki, vaksinasiya sahəsində kifayət qədər səy göstərilməməsi, demək olar ki, yox olmuş xəstəliklərin, o cümlədən difteriyanın geri qayıtmasına səbəb ola bilər. Təşkilatın ekspertlərində xüsusi narahatlıq doğuran məsələlərdən digəri 2021-ci ildən bəri xəstələnmə hallarının davamlı artdığı qızılca ilə bağlı vəziyyətdir.

"Qızılca xəstəliyinin artması, koronavirus pandemiyası zamanı və ondan sonra bir çox icmalarda baş verən immunizasiya əhatəsinin azalmasını əks etdirir", - deyə bəyanatda qeyd edilib.