Vyetnamın Donq Nay şəhəri yaxınlığında yol kənarındakı torpaq bəndə çırpılan yataq tipli avtobus (gecə səfərləri üçün adi oturacaqlar əvəzinə qatlana bilən yataq yerləri ilə təchiz olunmuş şəhərlərarası nəqliyyat vasitəsi) alışıb. Hadisə nəticəsində yeddi nəfər həyatını itirib, daha beş nəfər isə xəsarət alıb.
Oxu.Az xəbər verir ki, bu barədə rəsmi qurumlara istinadən "ABC News" məlumat yayıb.
Nəşrin məlumatına görə, avtobus yoldan çıxaraq torpaq bəndə çırpılıb. Birinci toqquşmadan sonra hərəkətini davam etdirən nəqliyyat vasitəsi ikinci bəndə dəyərək dayanıb. Bundan sonra avtobusda yanğın başlayıb və alov qısa müddət ərzində bütün salonu bürüyüb.
Xəsarət alan şəxslər xəstəxanaya yerləşdiriliblər. Ağır yol-nəqliyyat hadisəsinin başvermə səbəbləri araşdırılır.
