Kraşeninnikov vulkanında 4 000 metr yüksəkliyə qədər kül püskürməsi qeydə alınıb.
Oxu.Az xəbər verir ki, bu barədə Rusiya Fövqəladə Hallar Nazirliyi məlumat yayıb.
Bildirilir ki, kül şleyfi Kronotski körfəzi istiqamətində yayılıb. İlk püskürmə zamanı vulkanın külü altı kilometr yüksəkliyə qalxıb.
Kraşeninnikov vulkanı ilə əlaqədar narıncı aviasiya təhlükə kodu təyin edilib.
Alimlər Kamçatkada (Rusiya) Mutnovski vulkanında aktivlik qeydə alıblar, ərazidə termal anomaliya müşahidə olunur, "sarı" təhlükə səviyyəsi elan edilib.
Oxu.Az-ın məlumatına görə, bu barədə Rusiya Elmlər Akademiyasının Kamçatka filialının Geofizika Xidməti məlumat yayıb.
Bildirilir ki, anomaliya peyk görüntüləri vasitəsilə aşkar olunub.
"Vulkana sarı təhlükə kodu verilib. Güclü zəlzələlərin ocaq zonalarından gələn fasiləsiz afterşok axını səbəbindən vulkanın seysmik monitorinqi və püskürmələrin proqnozu mümkün deyil. Bu vulkanın, eləcə də yarımadanın digər vulkanlarının seysmogen aktivləşməsini nəzərə alaraq, əraziyə səfər qəti şəkildə tövsiyə edilmir", - deyə qurumdan bildirilib.
Hazırda Kamçatkada altı vulkan aktivlik göstərir və onlara yaxınlaşmaq tövsiyə edilmir. Avqustun 3-də Avaçinski, Klyuçevsk, Bezımyannı, Kambalnı və Karımski vulkanlarına Kronotski qoruğundakı Kraşeninnikov vulkanı da qoşulub. Avqustun 4-də isə Mutnovski vulkanı aktivləşib.
"Sarı kod" vulkan müşahidəsi və xəbərdarlıq sistemində dörd koddan ikincisidir, orta təhlükə səviyyəsi hesab olunur. Vulkanın aktivliyinin artması əlamətlərini bildirir, buna müvafiq olaraq da kiçik aviasiya üçün riskləri göstərir. Bundan sonra yüksək təhlükə kodları - "narıncı" və "qırmızı" gəlir.
