Göygöl rayonunda baş verən yanğın zamanı xəsarət alan şəxsin vəziyyəti açıqlanıb.
Oxu.Az-ın sorğusuna cavab olaraq Göygöl Rayon Mərkəzi Xəstəxanasından bildirilib ki, aprelin 7-də saat 03:10-da 1950-ci il təvəllüdlü şəxs (qadın) Göygöl Rayon Mərkəzi Xəstəxanasının Təcili tibbi yardım şöbəsinə hospitalizasiya olunub.
"Hipertoniya və üzün yanığı diaqnozları təyin edilən pasiyentə zəruri tibbi xidmətlər göstərilib. Vəziyyəti qənaətbəxş qiymətləndirilən şəxs ambulator müalicə üçün evə buraxılıb", - deyə məlumatda bildirilib.
Göygöl rayonunda yanğın yanğından mühafizə bölmələri tərəfindən söndürülüb.
Bu barədə Oxu.Az-a Fövqəladə Hallar Nazirliyinin (FHN) Mətbuat Xidmətindən məlumat verilib.
"Göygöl şəhərində bitişik tikilən birmərtəbəli evlərdən, ümumi sahəsi 70 m² olan evin dəhlizinin tavanı 25 m² sahədə və dam örtüyünün yanar konstruksiyaları 70 m² sahədə, ümumi sahəsi 120 m² olan evin dam örtüyünün yanar konstruksiyaları 70 m² sahədə, ümumi sahəsi 70 m² olan evin dam örtüyünün yanar konstruksiyaları 70 m² sahədə, ümumi sahəsi 200 m² olan evin dam örtüyünün yanar konstruksiyaları 5 m² sahədə və bitişik ümumi sahəsi 90 m² olan talvarın yanar konstruksiyaları yanıb. Evlərin qalan hissəsi və bitişik digər tikililər yanğından mühafizə olunub", - deyə məlumatda bildirilir.
Göygöl rayonunda yanğın hadisəsi baş verib.
Oxu.Az xəbər verir ki, hadisə bu gün saat 02:25-də M.Ə.Rəsulzadə küçəsi ev 23-də qeydə alınıb.
Belə ki, 1953-cü il təvəllüdlü Zeynəb Məhəmməd qızı Kazımova, 1950-ci il təvəllüdlü Svetlana Bəşir qızı Məmmədova və 1977-ci il təvəllüdlü Laləzar Səhrəddin qızı İmanovaya məxsus ümumi sahəsi 840 kvadratmetr olan evlərdə qəfil yanğın baş verib.
Hadisə nəticəsində Svetlana Məmmədova 1-ci dərəcəli yanıq xəsarəti alıb.
Qeyd edək ki, sözügedən tikililər alman memarlıq üslubunda, bir-birinə bitişik olmaqla, bir həyətdə bir neçə ailənin yaşadığı evlərdən ibarətdir.
