"Bir həftə əvvəl rəsmi olaraq boşanıblar. Bu gün qız işdən qayıdanda anası və iki uşağı da yanında olub".
Oxu.Az APA-ya istinadən xəbər verir ki, bu sözləri əri tərəfindən fiziki zorakılığa məruz qalaraq xəstəxanaya yerləşdirilən Şirvan Rayon Mərkəzi Xəstəxanasının ictimaiyyətlə əlaqələr üzrə mütəxəssisi Lamiyə Qanbayevanın dayısı Vüqar Ağayev deyib.
"Evə qalxanda Tural liftin qarşısında onların yolunu kəsib. Çünki bilirdi ki, Lamiyəgilin qapısında təhlükəsizlik kameraları var. İlk olaraq 11 bıçaq zərbəsi endirib, sonra başını divara çırpıb. Başını kəsmək istəyəndə qız başını çəkib, bıçaq ağız nahiyəsini də kəsib. Hadisə uşaqların gözü qarşısında baş verib. Hazırda Lamiyə bir saatdan çoxdur ki, əməliyyatdadır. Qonşular köməyə gələndə onun əlində bıçağı görüb hamısı qorxub qaçıblar. Yalnız bir qadın süpürgə ilə müdaxilə edib. Bu insanda narkotik vasitələrin təsiri hiss olunurdu, çünki ağzından köpük gəlirdi və görünürdü ki, o, içki təsiri altındadır. Son vaxtlar hamını şantaj edərək pul tələb edirmiş".
Mövzu ilə bağlı daha ətraflı videomaterialı təqdim edirik:
Şirvanda həyat yoldaşını bıçaqlayan şəxs barəsində axtarışlar aparılır.
Oxu.Az-ın məlumatınaa görə, Lamiyə Qanbayevanı bıçaqlamaqda şübhəli bilinən onun keçmiş həyat yoldaşı, 1986-cı il təvəllüdlü Tural Qanbayevin saxlanılması istiqamətində polis tərəfindən əməliyyat-axtarış tədbirləri həyata keçirilir.
Faktla bağlı araşdırma davam etdirilir.
Samir Əli
Şirvan Şəhər Mərkəzi Xəstəxanasının ictimaiyyətlə əlaqələr üzrə mütəxəssisi Lamiyə Qanbayeva ailə-məişət zorakılığı nəticəsində xəsarət alıb və xəstəxanaya yerləşdirilib.
Oxu.Az xəbər verir ki, bu barədə Tibbi Ərazi Bölmələrini İdarəetmə Birliyinin (TƏBİB) İctimaiyyətlə əlaqələr və kommunikasiya departamentinin rəhbəri Zamirə Ədilova sosial şəbəkə hesabında məlumat paylaşıb.
O bildirib ki, Lamiyə Qanbayeva müxtəlif bədən xəsarətləri alıb:
"Dərin təəssüf hissi ilə bildirirəm ki, həmkarımız, ictimaiyyətlə əlaqələr üzrə mütəxəssis Lamiyə ailə-məişət zorakılığına məruz qalaraq çoxsaylı kəsilmiş və deşilmiş yaralar alıb. Bədənin çoxsaylı yaraları diaqnozu ilə o, çalışdığı Şirvan Şəhər Mərkəzi Xəstəxanasında müayinədən keçirilib və üzərində cərrahi əməliyyat aparılıb".
Z.Ədilovanın sözlərinə görə, Lamiyə Qambayeva məsuliyyətli və mehriban bir əməkdaşdır: "Lamiyə həm çalışqan və peşəkar mütəxəssis, həm də olduqca mülayim və səmimi insandır. Hazırda onun müalicəsi Reanimasiya şöbəsində davam etdirilir, vəziyyəti orta ağır olaraq qiymətləndirilir. İnanırıq ki, dəyərli həkimlərimizin səyi və onun güclü iradəsi sayəsində Lamiyə bu sınaqdan da qalib çıxacaq və tezliklə sağalaraq yenidən aramıza dönəcək", - o paylaşımda bildirib.
Şirvan sakini, 1986-cı il təvəllüdlü Lamiyə Nəcməddin qızı Qanbayeva həyat yoldaşı tərəfindən bıçaqlanıb.
Oxu.Az APA-ya istinadən xəbər verir ki, 11 bıçaq yarası alan qadın Şirvan xəstəxanasına yerləşdirilərək əməliyyata götürülüb.
Qeyd edək ki, L.Qanbayeva "Şirvan şəhər mərkəzi xəstəxanası" Publik Hüquqi Şəxsin İctimaiyyətlə əlaqələr şöbəsinin əməkdaşıdır.
Faktla bağlı araşdırma aparılır.
