Yeddi körpənin öldüyü hadisə: "Əvvəllər də yanğın olub, tez söndürmüşük, heç kim bilməyib"

Bakı Ağır Cinayətlər Məhkəməsində Respublika Perinatal Mərkəzində baş verən yanğında ittiham olunan şəxslərin məhkəmə prosesi davam edib.

Oxu.Az-ın məlumatına görə, hakim Leyla Əsgərovanın sədrliyi keçirilən prosesdə şahid qismində ifadə verən Respublika Perinatal Mərkəzinin tibb bacısı Təranə Əhmədova bildirib ki, təqsirləndirilən şəxslərin hər üçünü tanıyır:

"Gecə biz altı nəfər növbədə idik. Gördük, dördüncü mərtəbədə yanğın var. Söndürməyə çalışsaq da, bacarmadıq. Yanğınsöndürən balon olsa da, yararsız idi. Ona görə də istifadə etmədik. Palatada yeddi küvez aparatı var idi, hamısında da körpələr. Yanğın elektrik yuvasından başladı və yayıldı. Biz uşaqları çıxarmağa başladıq. Sonra yanğını söndürməyə mühafizəçi gəldi.

Biz özümüz də yanğınla bağlı təlim keçmişik. Yanğın söndürməyə vedrə ilə su gətirirdik. Palatada 20-yə yaxın elektrik yuvası var idi. Onların əksəriyyətinin üstü açıq idi. Bizi də bir neçə dəfə elektrik cərəyanı vurmuşdu. Ehtimal ki, elə yanğın orada baş verib və yayılıb. Uşaq çox olanda biz elektrik yuvalarına uzadıcı taxırdıq. Hətta elə olub ki, uzadıcıya da uzadıcı taxırdıq.

Bu, mərkəzdə ilk yanğın deyildi. Əvvəllər də yanğın olmuşdu. İkinci və üçüncü mərtəbələrdə müxtəlif vaxtlarda kiçik yanğın olub. Onları tez söndürmüşük, heç kim bilməyib. Əvvəllər palata iki otaqdan ibarət idi. Mehriban Abasquliyeva direktor təyin edildikdən sonra palataların sayı əvvəl üç, sonra isə dörd oldu. Yüklənmə çox idi. İşimiz çoxalmışdı. Bizə təlim zamanı demişdilər ki, hər palatada ən çox dörd küvez ola bilər, amma bizim palatalarda küvez çox idi. Normativ sayda küvez olanda elektrik yuvaları bəs edirdi, uzadıcıya ehtiyac olmurdu, isidicilər belə bəs edirdi".

Hakim şahid ifadəsində ziddiyyət aşkarlandığı üçün onun ibtidai istintaqa ifadəsini elan edib.

Şahid ibtidai istintaqa ifadəsində alovun küvezdən qalxdığını desə də, məhkəmədə elektrik yuvasından baş verdiyini bildirib.

Şahid ibtidai istintaqa verdiyi ifadəni təsdiq edib.

Proses iyunun 30-da davam etdiriləcək.

Qeyd edək ki, 2024-cü il yanvarın 9-da "Respublika Perinatal Mərkəzi" PHŞ-nin inzibati binasında yanğın baş verib.

Yanğınla bağlı Baş Prokurorluqda Cinayət Məcəlləsinin 225.3 (yanğın təhlükəsizliyi qaydalarını pozma ehtiyatsızlıqdan iki və daha çox şəxsin ölümünə səbəb olduqda) və 314.3-cü (səhlənkarlıq iki və daha çox şəxsin ölümünə səbəb olduqda) maddələri ilə cinayət işi başlanaraq ibtidai istintaqın aparılması Baş Prokurorluğun İstintaq idarəsinə tapşırılıb.

İstintaqla müəyyən olunub ki, mərkəzin Anesteziologiya, reanimasiya və intensiv terapiya şöbəsinin Yenidoğulmuşların intensiv terapiya bölməsinin yerləşdiyi dördüncü mərtəbədəki palatasında baş vermiş yanğın nəticəsində yeddi yenidoğulmuş ölüb, dörd nəfər xəsarət alıb, müəssisəyə isə ümumilikdə 361 min manat məbləğində maddi ziyan vurulub.

Bundan başqa, Mehriban Abasquliyevanın 27 dekabr 2022-ci il tarixdə mərkəzin direktoru təyin edilməsindən sonra müəssisənin tibbi təminat resursları və potensialını nəzərə almadan xəstə qəbulu sayını iki dəfəyədək artırması nəticəsində müəssisənin elektrik təsərrüfatının artıq yüklənərək sonda yanğına səbəb olmasına əsaslı şübhələr müəyyən edilib.

Eyni zamanda, istintaqla Fövqəladə Hallar Nazirliyi tərəfindən mərkəzdə yoxlamalar aparılaraq yanğın təhlükəsizliyi qaydaları, xüsusən də, mövcud avtomatik yanğın xəbərverici siqnalizasiya qurğusunun nasazlığı, daxili yanğın su kranlarının işlək olmaması və elektrik təsərrüfatında nöqsanların olması mərkəzin rəhbərliyinə bildirilsə də, direktor və Mərkəzin Anesteziologiya, reanimasiya və intensiv terapiya şöbəsinin müdiri Hamlet Mustafayev və Dəstək Xidmətləri şöbəsinin müdiri Elnur Əhmədlinin nöqsanları aradan qaldırmamalarına əsaslı şübhələr müəyyən edilib.

Mərkəzin direktoru vəzifəsində işləmiş Mehriban Abasquliyeva Cinayət Məcəlləsinin 308.2 (ağır nəticələrə səbəb olan vəzifə səlahiyyətlərindən sui-istifadə) və 225.3-cü (yanğın təhlükəsizliyi qaydalarını pozma ehtiyatsızlıqdan iki və daha çox şəxsin ölümünə səbəb olduqda) maddələri, həmin mərkəzin şöbə rəisləri vəzifəsində işləmiş Hamlet Mustafayev və Elnur Əhmədli isə Cinayət Məcəlləsinin 225.3-cü maddəsi ilə təqsirləndirilən şəxs qismində cəlb edilərək onlara həmin maddələrlə nəzərdə tutulan ittiham elan edilib. Xatırladaq ki, cinayət işi üzrə zərərçəkmiş qismində Respublika Perinatal Mərkəzi, Elçin Gülmalı oğlu Nəcəfov, Vaqif İntiqam Hacıyev, Aynurə Qalib qızı Əhmədova, Gülbahar Zülfüqarova zərərçəkmiş qismində tanınıblar.

Elgün Həsənli