Azərbaycanın sərbəst güləş millisi Şimali Makedoniyanın paytaxtı Skopyedə keçirilən U-17 Avropa çempionatında komanda hesabında birinci olub.
Oxu.Az xəbər verir ki, Azərbaycan yığması qitə birinciliyində uğurlu çıxış edərək 6 medal qazanıb.
Güləşçilərimiz 3 qızıl, 1 gümüş və 2 bürünc medal əldə ediblər.
Bu nəticə ilə 151 xal toplayan millimiz növbəti dəfə Avropa çempionu olub. Ukrayna 144 xalla ikinci, Gürcüstan isə 116 xalla üçüncü yeri tutub.
Xatırladaq ki, böyük məşqçi Əsgərxan Novruzov, məşqçilər Vahid Məmmədovla Yaşar Əliyevin rəhbərliyi altında Rəvan Həsənzadə (48 kq), Ruslan Əlizadə (55 kq) və Səid Paşayev (92 kq) qızıl, Həsən Həsənov (60 kq) gümüş, Ramal Mirhüseynov (51 kq) və Hakim Tağıyev (110 kq) isə bürünc medal qazanıb.
Şimali Makedoniyanın paytaxtı Skopyedə keçirilən güləş üzrə U17 Avropa çempionatı sona çatıb.
Oxu.Az xəbər verir ki, bu gün sərbəst güləş üzrə 45, 51, 60, 71 və 92 kq-da qaliblər müəyyənləşib.
Ömər Usubov (45 kq) bürünc medal görüşündə ermənistanlı Aren Piruzyana 2:12 hesabıyla məğlub olaraq 5-ci yerlə kifayətlənib.
Ramal Mirhüseynov (51 kq) təsəlliverici görüşdə türkiyəli Buğra Kavakı çətinliklə də olsa, üstələməyi bacarıb - 2:1. Həmyerlimiz bürünc medal uğrunda qarşılaşmada isə ermənistanlı Vahan Azaryana gücünü göstərib - 10:6.
Həsən Həsənov (60 kq) finalda ukraynalı Zorab Aloyevlə gərgin keçən mübarizədə minimal fərqlə (4:5) uduzub və gümüş medalı boynundan asıb.
Səid Paşayev (92 kq) isə həlledici görüşdə rusiyalı Abdurazak Şabanovla üz-üzə gəlib. Nəfəskəsən mübarizədən 6:5 hesablı qələbəylə ayrılan Paşayev növbəti dəfə Avropa çempionu olub. Maraqlıdır ki, ötən il yunan-Roma güləşində qitənin ən güclüsü ünvanına sahib çıxan Səid bu dəfə eyni uğura sərbəst güləşdə imza atıb.
Beləliklə, Azərbaycan millisi Avropa çempionatını 3 qızıl, 2 gümüş və 2 bürünc medalla başa vurub. Ötən gün Rəvan Həsənzadə (48 kq) və Ruslan Əlizadə (55 kq) çempion olub, Hakim Tağıyev (110 kq) isə üçüncü yeri tutub.
