Bakıda keçiriləcək UFC gecəsi üçün bilet satışına start verildi

Azərbaycanda iyunun 21-də ilk dəfə keçiriləcək UFC (Ultimate Fighting Championship) döyüş gecəsi üçün biletlərin satışına başlanıb.

Bakı Şəhər Halqası (BŞH) Əməliyyat Şirkətinin (ƏŞ) Mətbuat Xidmətindən Oxu.Az-a verilən məlumata görə, biletləri iticket.az platforması üzərindən əldə etmək mümkündür.

Turnir Azərbaycan Respublikası Gənclər və İdman Nazirliyi və BŞH ƏŞ-nin təşkilatçılığı ilə həyata keçirilir.

BŞH ƏŞ-nin baş direktoru Maqsud Fərzullayev bildirib ki, UFC-nin Bakıya gəlişi Azərbaycanın idman tarixində yeni bir səhifə açır:

"Azərbaycan beynəlxalq miqyaslı tədbirlərə uğurla ev sahibliyi edir. UFC ilə tərəfdaşlıq ölkəmizin illərdir ki, idman sahəsindəki dinamik inkişafının, ölkə rəhbərliyinin uğurlu idman siyasətinin məntiqi davamıdır."

M.Fərzullayev, həmçinin turnirin təşkili prosesində dəstəyini əsirgəməyən bütün tərəfdaş və sponsorlara təşəkkürünü bildirib.

Tədbirə maraq olduqca yüksəkdir. Hadisəyə sayılı günlər qalır. Avropa və dünyanın müxtəlif ölkələrindən minlərlə UFC azarkeşi səbirsizliklə bilet əldə etməyə tələsir. Gözlənilən qonaqlar sırasında UFC əfsanəsi Həbib Nurməhəmmədov və döyüşçü Taqir Ulanbekov da var. Gecənin əsas döyüşündə UFC-nin keçmiş yarım ağır çəki üzrə çempionu və reytinq cədvəlində dördüncü pillədə qərarlaşan Camal Hill yeddinci yerdə olan Xalil Rauntree ilə qarşılaşacaq. Minlərlə MMA azarkeşi "Cristall hall"da döyüşçüləri, xüsusilə də azərbaycanlı idmançıları dəstəkləmək üçün bir araya gələcək.

Maqsud Fərzullayev qarşıda ölkənin daha bir mötəbər tədbirə - "Formula-1" üzrə Azərbaycan Qran-prisinə ev sahibliyi edəcəyini də vurğulayıb. "Yarışa beş aydan az zaman qalıb. Hazırlıq sürətlə davam edir, nəticələr gözlənildiyindən daha yüksəkdir. Bilet alan azarkeşlərin 80 faizdən çoxunu xarici vətəndaşlar təşkil edir."

Qeyd edək ki, UFC-nin 700 milyondan çox azarkeşi və 300 milyona yaxın sosial media izləyicisi var. Turnirlər 170-dən artıq ölkədə yayımlanır və hər il təxminən bir milyard ünvanı əhatə edir.