"Barselona" "Atletiko Madrid"in hücumçusu Xulian Alvareslə bağlı transfer planlarını dəyişib.
Oxu.Az xəbər verir ki, Kataloniya klubunun idman direktoru Dekonun açıqlamasına görə, argentinalı futbolçunun transferi artıq gündəmdə deyil.
Klub rəsmisi bildirib ki, "Barselona" Alvares üçün təklif göndərsə də, "Atletiko" onu satmaq niyyətində olmayıb. Bu səbəbdən Kataloniya təmsilçisi hücum xəttini gücləndirmək üçün başqa variantlara yönəlib.
Dekonun sözlərinə görə, Qabriel Jesus məhz Alvares transferinin mümkünsüz olduğu aydınlaşdıqdan sonra seçilib. O, braziliyalı hücumçunun komanda üçün uyğun variant olduğunu vurğulayıb.
Bununla yanaşı, Rafinya da yeni mövqedə uğurlu çıxışı ilə diqqət çəkir. Braziliyalı futbolçu "Barselona"nın hücum xəttində mühüm rol oynayır. Klub noyabrın 5-də onunla müqaviləni 2030-cu ilin yayına qədər uzadıb.
Qeyd edək ki, "Barselona" ilə "Atletiko" noyabrın 8-də İspaniya çempionatının XII turunda üz-üzə gələcəklər.
