FIFA dünya çempionatının 1/8 final oyunundan əvvəl ABŞ millisinin hücumçusu Folarin Baloqunun diskvalifikasiyasını ləğv edərkən tamamilə müstəqil qərar qəbul edib. Bu barədə FIFA prezidenti Canni İnfantino bəyan edib.
Oxu.Az xəbər verir ki, ali futbol qurumunun rəhbərinin fikirləri təşkilatın "X" sosial şəbəkəsindəki hesabında yerləşdirilib.
* DÇ-2026-da qırmızı vərəqə qalmaqalı: UEFA-dan FIFA-nın Baloqanla bağlı qərarına sərt reaksiya
Turnirdə ABŞ yığmasının ən yaxşı bombardiri olan Baloqun bosniyalılarla keçirilən matçda meydandan qovulmuşdu və Belçika ilə 1/8 final qarşılaşmasını buraxmalı idi. Lakin FIFA-nın İntizam Komitəsi ona birillik sınaq müddəti təyin edərək oyuna buraxıb.
"FIFA-nın məhkəmə orqanları müstəqildir. Onlar İntizam Məcəlləsini tətbiq edir və işlərlə bağlı qərarları qüvvədə olan reqlamentlər, eləcə də ixtiyarlarında olan xüsusi hallar əsasında qəbul edirlər", - deyə İnfantino bildirib.
İnfantino ABŞ Prezidenti Donald Trampın ona zəng etdiyini də təsdiqləyib: "Mən ABŞ Prezidenti ilə dünya çempionatı ilə bağlı məsələləri mütəmadi olaraq müzakirə edirəm. Bu mövzuda da Donald Tramp mənə zəng etmişdi. Necə ki, dünyanın hər yerindən dövlət başçıları, hökumət rəsmiləri, futbol ictimaiyyətinin nümayəndələri və biznes rəhbərləri ən müxtəlif məsələlərlə bağlı mənə zəng edirlər".
İnfantinonun sözlərinə görə, söhbət zamanı o, FIFA-nın müstəqil məhkəmə orqanlarının iştirakı ilə hüquqi prosesin getdiyini və işə müvafiq qurumlar tərəfindən müəyyən edilmiş qaydada baxılacağını izah edib.
FIFA rəhbəri İntizam Komitəsinin qərarlarını qəbul olunduqdan sonra oxuduğunu da qeyd edib:
"Bəzən bu qərarlar məni təəccübləndirir. Bəzən onlarla razılaşıram, bəzən isə yox. Lakin mən bu qərarlara hər zaman hörmət edirəm. Hansısa qərarın şəxsən bizim xoşumuza gəlib-gəlməməsinin heç bir əhəmiyyəti yoxdur".
