2026-cı il futbol üzrə dünya çempionatının (DÇ-2026) Fransa və İspaniya arasında keçiriləcək yarımfinal matçının hakimləri açıqlanıb.
Oxu.Az xəbər verir ki, bu barədə FIFA-nın rəsmi saytında məlumat verilib.
Vacib matçın baş hakimi vəzifəsi salvadorlu İvan Bartona həvalə edilib.
Ali futbol təşkilatının referi seçimi bir çox futbol azarkeşləri üçün sürpriz olub. Bir çox fanatlar futbolu zəif inkişaf etmiş ölkədən olan hakimin belə həlledici və böyük matçın öhdəsindən gələ bilməyəcəyindən narahatdırlar.
Barton futbol aləmində o qədər də tanınmayan bir ölkəni təmsil edir. Tarixə nəzər salsaq, Salvador 1970 və 1982-ci illərdə iki dəfə dünya çempionatına vəsiqə qazanıb. Buna baxmayaraq, uzun onilliklər ərzində bu ölkədə futbol ciddi tənəzzül dövrünü yaşayıb və yüksəksəviyyəli nailiyyətlər qeyd alınmayıb.
Hazırda İvan Barton Salvador futbolunun ən tanınmış siması hesab olunur. 35 yaşlı ədalət təmsilçisi kimya ixtisası üzrə ali təhsil alıb və hətta Salvador Universitetində öz peşəsi üzrə müəllim kimi fəaliyyət göstərib.
Universitet müəllimi kimi fəaliyyətindən əlavə, Barton özünü futbola da həsr edərək 30 yaşına çatmamış FIFA hakimi adını qazanıb. O, DÇ-2022-də iştirak edib və 2026-cı il mundialında öz işini davam etdirir.
DÇ-2026-da Barton üç mühüm qarşılaşmanı idarə edib: qrup mərhələsində Türkiyə - Paraqvay və Yaponiya - İsveç oyunları, eləcə də 1/16 final çərçivəsində baş tutan İsveçrə - Kolumbiya matçı.
Qeyd edək ki, Fransa - İspaniya oyunu iyulun 14-də Bakı vaxtı ilə saat 23:00-da başlayacaq.
