Beynəlxalq Avtomobil Federasiyası (FIA) "Formula-1" üzrə Las-Veqas Qran-prisində "Mclaren" komandasının pilotları olan britaniyalı Lando Norris və avstraliyalı Oskar Piastrinin nəticələrini ləğv edib.
Oxu.Az bildirir ki, bu barədə FIA-nın Mətbuat Xidməti məlumat yayıb.
Diskvalifikasiyaya səbəb kimi bolidlərin alt plankasının həddindən artıq aşınması göstərilir.
Qeyd edək ki, "Red Bull" komandasının niderlandlı pilotu Maks Ferstappen Las-Veqas Qran-prisinin qalibi olub. Lando Norris ikinci yer tutub. Amma onun cəzasından sonra ilk üçlüyü tamamlayan "Mercedes"dən Corc Rassell bir pillə yüksəlib. Podiumun son pilləsinə isə onun komanda yoldaşı Kimi Antonelli qalxıb.
Verilən cəzalardan sonra turnir cədvəlində də dəyişiklik baş verib. Belə ki, çempionatın lideri Norrisin xalları 390-a düşüb. Onun avstraliyalı komanda yoldaşı Oskar Piastri, eləcə də Maks Ferstappen 366 xalla 2-3-cü yerləri bölüşürlər.
