İspaniya Kral Futbol Federasiyası (RFEF) milli komandanın qadın futbolçularına yumurta hüceyrələrini dondurmaq imkanı təqdim etmək üçün reproduktiv tibb klinikası ilə razılaşma imzalayacaq.
Oxu.Az xəbər verir ki, bu barədə "El Pais" nəşri məlumat yayıb.
Nəşrin məlumatına əsasən, bu addım idman karyerası ilə analığı uzlaşdırmaq problemini rəhbərliyin diqqətinə çatdıran ikiqat "Qızıl top" sahibi Aleksiya Putelyasın təşəbbüsündən sonra atılıb.
"Mənim üçün bu, irəliyə doğru atılmış çox böyük bir addımdır. Çünki federasiya bioloji vaxtınıza baxmayaraq ölkənizə xidmət etdiyinizi və bədəninizin iş üçün lazım olduğu üçün ana ola bilməyəcəyinizi dərk edir", - deyə A.Putelyas vurğulayıb.
Məlumata görə, müqavilənin təfərrüatı sentyabrın ikinci yarısında rəsmi olaraq açıqlanacaq. Federasiyanın hansı xərcləri ödəyəcəyi, proqramdan kimlərin yararlana biləcəyi və yumurta hüceyrələrinin nə qədər müddətə dondurulacağı hələlik məlum deyil.
Qadın idmanında bu cür təcrübələr getdikcə populyarlaşır: bundan əvvəl analoji müqaviləni Londonun "Çelsi" klubu da bağlamışdı. Bununla yanaşı, Britaniya futbolçular həmkarlar ittifaqı və İspaniyanın "Futpro" assosiasiyası da müvafiq klinikalarla əməkdaşlıq edir.
Qeyd olunur ki, bu təşəbbüsün qarşısında müəyyən maneələr də mövcuddur - nə FIFA, nə də UEFA-da bu cür tibbi prosedurlar üçün protokollar yoxdur. Bundan əlavə, yumurtalıqların stimullaşdırılması üçün istifadə olunan bəzi dərmanlar Ümumdünya Antidopinq Agentliyi (WADA) tərəfindən qadağan edilib ki, bu da hər bir fərdi hal üçün terapevtik istisnalar tələb etməyə məcbur edir.
