Macarıstanın Debretsen şəhərində baş tutan Macarıstan-Qazaxıstan futbol matçı zamanı gözlənilməz hadisə baş verib. Yüksəklikdə asılmış kamera meydançanın yan xəttinin yaxınlığına düşüb.
Oxu.Az-ın xəbərinə görə, bu barədə Sports.kz məlumat verib.
Məlumata görə, stadionun damının altında bərkidilmiş və kabel (tros) sistemi boyunca hərəkət edən kamera qəfildən alovlanıb, onu saxlayan kabeli yandırıb və daha sonra təxminən iyirmi metr hündürlükdən operatorun bir metr məsafəsində, Macarıstan komandasının isinmə zonasının yaxınlığında meydançaya düşüb.
Oyuna fasilə verilib və kameranın parçalanmış qalıqları meydançadan yığışdırılıb.
Qeyd edək ki, matç Macarıstan millisinin 3:1 hesablı qələbəsi ilə başa çatıb.
