"Qarabağ"ın və Azərbaycan millisinin sabiq futbolçusu Riçard Almeyda Braziliya mətbuatına müsahibə verərkən azərbaycanlıların elə də futbol azarkeşi olmadlıqlarını deyib.
Oxu.Az xəbər verir ki, 36 yaşlı yarımmüdafiəçi "YouTube" kanalında yayımlanan "Exclusiva TSP" verilişində sualları cavablandırıb.
"Azərbaycanda çox azarkeş olmur, onlar futbolun elə də böyük fanatları deyillər. Ancaq Avropa Liqasında və ya Çempionlar Liqasında oynayanda stadion dolurdu. Yerli liqada isə yalnız derbi oyunlarında stadionda azarkeş çox olur.
Amma burada, Braziliyada küçədə azarkeşi görürsən. Son oyunlarda "Santo Andre"də stadiona daxil olarkən azarkeşlərin dəstəyi inanılmaz idi. Braziliyadan tez ayrıldığım üçün bu hissi burada əvvəl yaşamamışdım. Hətta telefonumda videolar saxlamışam. Bu, braziliyalıların futbola necə aşiq olduqlarını göstərir".
