Ruslan Əmircanov: "Qələbə üçün dəridən-qabıqdan çıxmalısan"

"Əgər qalib gəlmək istəyirsənsə və rəqib səndən güclüdürsə sən ondan daha çox qaçmalısan, yeri gəlsə, güləşməlisən, qalib gəlmək üçün hər şey etməlisən".

Bunu Oxu.Az-a açıqlamasında Azərbaycan millisinin sabiq futbolçusu Ruslan Əmircanov Belarusla oyunöncəsi açıqlamasında deyib:

"Millimizin Haiti seçməsinə uduzmasını azarkeşlər fiasko adlandırsalar da, bu, elə deyil. Rəqibin reytinq cədvəlindəki yerinə baxsaq, aradakı fərqi rahatlıqla görə bilərik. Haiti millisində çıxış edən bütün futbolçular legioner həyatı yaşayırlar və keyfiyyət baxımından üstün idilər. Bizim futbolçularımız isə fərdi keyfiyyətə sahib olsalar da, düzgün komanda anlayışı və strategiya ilə qələbə qazana bilərlər. Bizim dövrümüzdə bütün futbolçular Azərbaycan millisinin formasını geyinəndə qələbə qazanmaq üçün dəridən-qabıqdan çıxırdılar. Uduzsaq da, əziyyət çəkirdik. Ən azından baxımlı futbol nümayiş etdirməyə və məşqçiyə özümüzü göstərməyə çalışırdıq. Hər dövrün özünə uyğun futbol anlayışı var. Əvvəllər smartfonlar və s. yox idi. İndi isə artıq yeni texnologiya dövrüdür. Bu futbola da təsir edir və inkişaf fərqli istiqamətdə davam edir. İndi futbol səhvlər üzərində qurulub. Kiçik bir səhv məğlub olmağına, rəqibin bundan faydalanmasına səbəb olur. Ona görə də, ağıllı futbol oynamaq, düzgün komanda formalaşdırmaq lazımdır".

Ruslan Əmircanov əlavə olaraq Fernandu Santuşun Belarus millisi ilə oyundan əvvəl mətbuat konfransındakı fikirlərinə münasibət də bildirib:

"Fernandu Santuş Avropa çempionu olmuş ağıllı məşqçidir. Əgər müdafiə xəttində problemlərin olduğunu deyirsə, deməli, belədir. Məşqçi tapşırıqları verib futbolçulara yön göstərir. Qalanı isə futbolçulardan asılı olur. Belə olan halda Fernandu Santuşun üzərinə getmək də doğru olmaz. Azərbaycan millisi "Barselona" deyil ki, yeddi oyunda dirçəldib mükəmməl komanda yarada biləsən. Fernandu Santuşa zaman verməli, gördüyü işlərə hörmətlə yanaşmalıyıq".

Anar Həsənov