Türkiyə Futbol Federasiyası Super Liqanın VII turunda keçirilən oyunlarda VAR sistemi ilə bağlı danışıqları açıqlayıb. Qeydlərdə "Konyaspor" - "Başakşehir" matçında yaşanan mübahisəli penalti epizodu da yer alıb.
Oxu.Az xəbər verir ki, danışıqlar Türkiyə Futbol Federasiyasının "YouTube" kanalında yayımlanıb.
Epizod zamanı VAR hakimi Batuhan Kolak topun əvvəlcə müdafiəçinin bükülü qoluna, daha sonra isə açıq əlinə dəyib-dəymədiyini yoxlamaq üçün iki fərqli kamera bucağından görüntü təqdim edəcəyini bildirib.
Batuhan Kolak qapı arxasından çəkilmiş görüntünü istəyərək "Başqa bucağınız yoxdur?" sualını verib. VAR hakimi isə həmin bucaqdan topun sol ələ dəydiyini görmədiyini bildirib.
Bundan sonra Kolak penalti qərarını ləğv edib və oyunun ofsayd qərarı ilə davam etdirilməsinə göstəriş verib.
"Konyaspor"un baş məşqçisi İlhan Palut matçdan sonra VAR yoxlaması zamanı hakimə uyğun görüntünün təqdim edilmədiyini bildirib.
"VAR ekranında hakimə kifayət qədər uzaq və keyfiyyətsiz görüntü təqdim olundu. Topun müdafiəçinin bükülü əlinə dəyməsi ehtimalı var, lakin təqdim edilən texniki imkanlar və görüntülər insanları inandıracaq qədər aydın deyildi", - deyə Palut vurğulayıb.
