Azərbaycanda avtomobil sənayesinin daha da modernləşdirilməsi, yüksək keyfiyyət göstəricilərinə uyğunlaşdırılması istiqamətində “Azərmaş” ASC ilə Özbəkistanın “UzAuto Motors” şirkəti arasında əməkdaşlıq əlaqələri qurulub.
Bizim.Media xəbər verir ki, bu barədə İqtisadiyyat Nazirliyindən məlumat verilib.
Beş ölkənin təcrübəsi və texnologiyası gündəmdə
Qeyd edilir ki, hazırda Hacıqabul Sənaye Məhəlləsində “Chevrolet” brendinin “Nexia”, “Cobalt”, “Malibu”, “Tracker” və “Equinox” modelləri və sair markalı avtomobillər istehsal olunur. Avtomobil sənayesində istehsal prosesinin gücləndirilməsi məqsədilə 2023-cü ilin may ayında Hacıqabul Sənaye Məhəlləsində təməli qoyulmuş boyaq, qaynaq müəssisəsində istehsalın daha dərin lokallaşdırılması nəzərdə tutulur.
ABŞ, İtaliya, Çin, Koreya və Özbəkistan texnologiyaları əsasında fəaliyyət göstərəcək zavodun illik istehsal gücünün 30 min ədəd avtomobil olması nəzərdə tutulur. Müəssisədə 1200-dən çox iş yeri yaradılacaq.
İqtisadiyyat Nazirliyindən Bizim.Media-ya verilən açıqlamada istehsal olunan avtomobillərin yerli şəraitə tam uyğun şəkildə hazırlanacağı və həm daxili bazarda təklif olunacağı, həm də xarici bazarlara ixrac ediləcəyi bildirilib.
Hazırda ölkəmizdə nə qədər avtomobil istehsal olunur?
Qeyd edək ki, hazırda yerli zavodlarımız istehsaldan çox yığıma üstünlük verir, yəni xaricdən alınan ehtiyat hissələrindən istifadə etməklə minik avtomobilinin yığımı həyata keçirilir.
İN tərəfindən Hacıqabul Sənaye Məhəlləsində adıçəkilən zavodun inşası ilə bağlı məlumat yayıldıqdan sonra hamıda belə ümid yaranıb ki, bundan sonra həm ehtiyat hissələri, həm də avtomobilin özü tam yerli istehsal olacaq.
“Hələ işin başlanğıcıdır”
Nəqliyyat sahəsi üzrə ekspert Yasin Mustafayev Bizim.Media-ya açıqlamasında, avtomobil istehsalımızın artırılması yönündə atılan addımı müsbət hal kimi dəyərləndirib.
Azərbaycanda hazırda bir neçə avtomobil modelinin istehsal olunduğunu xatırladan ekspert, əslində onların ehtiyat hissələrinin xaricdən gətirildiyini və ölkəmizə yığıldığını bildirdi:
“Amma bu da görülən işin başlanğıcıdır. Bu sahə təkmilləşdikcə, bizdə də ehtiyat hissələrinin istehsalı başlayacaq. Bu da müəyyən dövr və bir qədər çox sərmayə tələb edir”.
Müsahibimiz, hazırda tikilən zavodu nəzərdə tutulan istehsal gücünü müasir dövrün tələbi kimi dəyərləndirdi:
“Özümüz nə qədər çox avtomobil istehsal etsək, bir o qədər çox valyutanın ölkədən çıxmasının qarşısını ala bilərik. Ona görə ki, hazırda “Chevrolet” yalnız ABŞ-da, Koreyada, Özbəkistanda istehsal olunur. Bunun bizdə də istehsal olunacağı ilə bağlı xəbərin açıqlanmasını müsbət hal kimi dəyərləndirirəm. Bununla belə arzu edirəm ki, bizim də öz markamız, öz brendimiz olsun”.
Nəticələr müsbət olarsa...
Gələcəkdə istehsal olunacaq avtomobillərin daxili bazar üçün nəzərdə tutulduğunu deyən ekspert vurğulayıb ki, əgər nəticələr müsbət olarsa, bir çox ölkələrə də bu maşınları ixrac etmək olar:
“Əsasən də qonşu Rusiyaya, Gürcüstana, Orta Asiya ölkələrinə ixracı planlaşdırıla bilər. Əsas məsələ isə qiymət uyğunluluğu, keyfiyyət, komfort və müasir dövrlə uyğunlaşmasıdır. Bir də elektromobil və hibridyönümlü avtomobillər istehsal olunsa, daha da rəqabətədavamlı olar”.
Məlumat üçün bildirək ki, 2023-сü ildə Azərbaycanda 3738 ədəd və ya əvvəlki illə müqayisədə 1689 ədəd çox minik avtomobili istehsal olunub. Cari ilin yanvarın 1-nə qədər isə hazır avtomobillərin sayı 17 ədəd olub.
