Bu gün Bakı şəhərində Xəzəryanı Regionu Aqrar Tədqiqatlar Mərkəzi (CARCAS) ilə "Melo Dora" MMC arasında əməkdaşlığa dair memorandum imzalanıb.
Oxu.Az xəbər verir ki, sənəd kənd təsərrüfatının müasir istiqamətlərdə inkişafı, yerli ting istehsalının genişləndirilməsi, aqrotexniki xidmətlərin göstərilməsi və davamlı aqrobiznes modellərinin tətbiqi üzrə tərəfdaşlığın əsaslarını müəyyən edir.
Əməkdaşlıq aşağıdakı sahələri əhatə edir:
- yüksəkkeyfiyyətli tinglərlə təminat,
- bağların salınması və aqrotexniki müşayiət,
- birgə istehsal və tədris təşəbbüslərinin həyata keçirilməsi.
Memorandum çərçivəsində kənd təsərrüfatı sahəsində süni intellektə əsaslanan proqramların işlənib-hazırlanması üzrə razılıq əldə olunub. Bu proqramlar məhsuldarlığın proqnozlaşdırılması, torpaq və bitkilərin vəziyyətinin monitorinqi, eləcə də aqrotexnoloji proseslərin idarə edilməsi sahələrini əhatə edəcək.
Əməkdaşlığın mühüm hissəsi olaraq Kənd Təsərrüfatı Akademiyasının yaradılması nəzərdə tutulur. Akademiya CARCAS Mərkəzinin və "Melo Dora" MMC-nin birgə təşəbbüsü ilə təsis ediləcək. Akademiyanın məqsədi - aqronomların və gənc mütəxəssislərin hazırlanması və qabaqcıl təcrübələrin və innovasiyaların yayılmasıdır. Bu istiqamətdə Azərbaycan Dövlət Aqrar Universiteti və Kənd Təsərrüfatı Nazirliyinin elmi-tədqiqat institutları ilə sıx əməkdaşlıq planlaşdırılır.
CARCAS Müşahidə Şurasının sədri Rifat Sultan-zadə qeyd etdi:
"Biz təkcə tərəfdaşlıq deyil, eyni zamanda elmi, istehsalı və texnologiyanı birləşdirən bir ekosistem yaradırıq. Bu əməkdaşlıq Azərbaycanın kənd təsərrüfatını yeni və dayanıqlı inkişaf mərhələsinə çıxaracaq. Bugünkü imzalanma çərçivəsində tərəflər həmçinin Mərkəzin layihə təşəbbüsündə - əsas vəzifəsi yüksək keyfiyyətli yerli əkin materialı çatışmazlığını aradan qaldırmaq və idxalı əvəzlənməsi olan - yerli ting bazarının formalaşdırılması, gələcəkdə isə yeni ixrac istiqamətinin açılması üçün tingçilik təsərrüfatının yaradılmasında birgə iştirak etmək barədə razılığa gəliblər".
Bağçılıq və emal sahəsində ixtisaslaşan "Melo Dora" MMC isə istehsal proseslərinin rəqəmsallaşdırılması və lokallaşdırılması da daxil olmaqla uzunmüddətli təşəbbüslərə sərmayə yatırmağa hazır olduğunu bildirib.
CARCAS öz növbəsində təsdiq edib ki, onun missiyası - elmi mühit, istehsalçılar və beynəlxalq tərəfdaşlar arasında körpü rolunu oynayaraq kənd təsərrüfatının səmərəli və müasir inkişafını təmin etməkdir.
