Ermənistan Parlamenti TRIPP layihəsi ilə bağlı növbədənkənar iclas keçirəcək. Müvafiq qərar hökumətin iclasında təsdiqlənib.
Oxu.Az-ın xəbərinə görə, bu barədə "Sputnik Armenia" nəşri məlumat verib.
Məlumata görə, növbədənkənar iclasın gündəliyinə "Səhmdar cəmiyyətləri haqqında" qanuna dəyişiklik layihəsi daxil edilib ki, buna əsasən beynəlxalq müqavilələr əsasında yaradılmış və Ermənistan hökumətinin 25% və ya daha çox payı olan şirkətlərin hüquqi münasibətləri tənzimlənəcək. Bu, göstərilən marşrutun tikintisi və idarə olunması üçün yaradılmış, eyni zamanda beynəlxalq formatda yaradıla biləcək digər şirkətlər üçün də nəzərdə tutulmuş "TRIPP Development Company" şirkətinin işini tənzimləməyə kömək edəcək.
Qanun layihəsinin təxirəsalınmaz qaydada qəbul edilməsi təklif olunur (birinci oxunuşdan sonrakı 24 saat ərzində ikinci oxunuşun keçirilməsi).
Xatırladaq ki, oktyabrın 28-də parlament Ermənistan və ABŞ arasında TRIPP marşrutu üzrə hökumətlərarası çərçivə sazişini ratifikasiya edib.
Xatırladaq ki, 2025-ci il avqustun 8-də ABŞ Prezidenti Donald Trampla Vaşinqtonda keçirilən üçtərəfli görüşdən sonra Azərbaycan Prezidenti İlham Əliyev və Ermənistanın baş naziri Nikol Paşinyan Bakı ilə İrəvan arasında sülh nizamlanması və Azərbaycanın əsas hissəsi ilə Naxçıvan arasında nəqliyyat kommunikasiyalarının yaradılması haqqında birgə bəyannamə imzalayıblar. Bu layihə "Beynəlxalq Sülh və Rifah üçün Tramp Marşrutu" (TRIPP) adını alıb.
TRIPP layihəsi Ermənistanın Zəngəzur (Sünik) bölgəsi üzərindən strateji tranzit dəhlizinin yaradılmasını nəzərdə tutur.
Təşəbbüs iqtisadi xarakter daşıyır və dəmiryolu, avtomobil yolu, neft kəməri, qaz kəməri və fiber-optik rabitə xətlərinin tikintisini əhatə edir. Layihənin reallaşdırılması ilə Ermənistan qanunvericiliyinə uyğun olaraq və hərbi komponent olmadan ABŞ şirkəti məşğul olacaq. Plana əsasən, ABŞ layihəni 99 ilə qədər həyata keçirmək üçün eksklüziv hüquqlar əldə edəcək və ayrı-ayrı hissələri beynəlxalq konsorsiuma subicarəyə vermək imkanı olacaq ki, bu da infrastrukturun inkişafı və təhlükəsiz istismarı üçün məsuliyyət daşıyacaq.
