Prezident İlham Əliyev "Qlobal təhlükəsizliyə regional töhfə: Cənubi Qafqazda sülh quruculuğu" mövzusunda Şuşada keçirilən beynəlxalq konfransın iştirakçılarına müraciətində növbəti dəfə Zəngəzur dəhlizinin əhəmiyyətindən danışıb.
Azərbaycanın regionda davamlı sülh və sabitlik mühitinin yaradılması və qorunması istiqamətində qətiyyətli siyasət həyata keçirdiyini deyən dövlət başçısı, ötən il Vaşinqtonda Amerika Birləşmiş Ştatlarının Prezidenti Donald Trampın şahidliyi ilə Azərbaycan və Ermənistan liderləri arasında Birgə Bəyannamənin imzalanması, sülh sazişinin paraflanmasının Cənubi Qafqazda vəziyyəti tamamilə dəyişdiyini bildirib:
"Bu xüsusda, reallaşmaqda olan Zəngəzur dəhlizi həm Azərbaycanın əsas hissəsi ilə onun Naxçıvan bölgəsini birləşdirəcək, həm də Orta Dəhlizin əsas seqmentlərindən birinə çevriləcək", - deyə Azərbaycan Prezidenti əlavə edib.
Dəhlizin əhəmiyyəti və gələcək perspektivlərini Oxu.Az-a şərh edən Milli Məclisin İqtisadi siyasət, sənaye və sahibkarlıq komitəsinin üzvü, iqtisad elmləri doktoru Əlibala Məhərrəmzadə vurğulayıb ki, Zəngəzur dəhlizinin açılmasından sonra Bakı və İrəvan arasındakı əlaqələri daha da sülhməramlı səviyyəyə gətiriləcək:
"Bunun əsası isə xarici kapitalın, logistikanın buradan keçməsi, kifayət qədər əhatəli infrastrukturun qurulacağı və böyük bir investisiya mühitinin yaradılması ilədir. Eyni zamanda, gələcəkdə dəhlizin iştirakçı ölkələri tərəfindən çox sayda iş yerlərinin açılması, Azərbaycanın əsas hissəsi ilə Naxçıvanın birləşməsi, Ermənistanın regionda dalan iqtisadiyyatından çıxıb, aktiv iqtisadiyyata qoşulması Zəngəzur dəhlizinin açılmasından sonra mövcud olacaq".
"Amma burada ən önəmli məsələ iqtisadiyyatın şaxələnməsi və qoyulacaq investisiyalardır. Qeyd edim ki, Çin burada ən önəmli faktorlardan biridir. Çin mallarının Avropaya daşınması və gələcəkdə Çinin planlamasında təqribən bir trilyonluq malın Avropaya aparılması istiqamətində əsas perspektivlərdən biri də Zəngəzur dəhlizidir. Həm də Zəngəzur dəhlizi hesabına Çindən Avropaya gedəcək malların zamanı da qısalacaq", - deyə müsahibimiz vurğulayıb.
Milli Məclisin deputatı əlavə edib ki, Bakı limanın fəaliyyəti ilə Zəngəzur dəhlizinin əhəmiyyəti daha da artacaq, vaxt və xərclər azalacaq:
"Bu da Azərbaycanı logistik mərkəzə çevirəcək. Bununla da dəhliz gələcəkdə əhəmiyyətinə görə Panama və Süveyş kanalları formatında mühüm göstəricilərə malik olacaq".
