Bakıda adam öldürməyə cəhddə təqsirləndirilən S.S.-nin cinayət işi üzrə məhkəməsi yekunlaşıb.
Oxu.Az-ın məlumatına görə, Bakı Ağır Cinayətlər Məhkəməsinin hakimi Firdovsi Əliyevin sədrliyi ilə keçirilən prosesdə hökm oxunaraq S.S. 6 il 6 ay azadlıqdan məhrum edilib.
Xatırladaq ki, ötən prosesdə prokuror onun 7 il 6 ay azadlıqdan məhrum olunmasını məhkəmədən xahiş etmişdi.
Qeyd edək ki, hadisə 2025-ci il oktyabrın 13-də Bakı şəhəri, Binəqədi rayonu, 28 May qəsəbəsində baş verib.
İttihamda qeyd olunur ki, təqsirləndirilən şəxs tanışının elektron qəlyanını alıb geri qaytarmayıb. Tərəflər arasında da mübahisə elə bundan sonra baş verib.
Təqsirləndirilən yeniyetmənin bıçaqladığı yeniyetmə isə onun qəlyanını aldığı şəxsin qardaşı olub.
Bir qrup yeniyetmə arasında qanlı insidentlə nəticələnən mübahisənin də əsas predmeti həmin elektron qəlyan olub.
Faktla bağlı cinayət işi başlanılaraq CM-in 29,120.2.2-ci (xuliqanlıq niyyəti ilə qəsdən adam öldürməyə cəhd), 29. 120.2.4-cü maddəsi (xüsusi amansızlıqla və ya ümumi təhlükəli üsulla qəsdən adam öldürməyə cəhd) 221.2.1 (xuliqanlıq) maddələri ilə məsuliyyətə cəlb olunub, barəsində həbs qətimkan tədbiri seçilib.
Elgün Həsənli
