Beş ailə üzvünü öldürməkdə təqsirləndirilən Əhmədin işini hansı hakim aparacaq?

İkisi uşaq olmaqla beş ailə üzvünü qətlə yetirməkdə ittiham olunan Əhməd Əhmədovun cinayət işi üzrə ibtidai istintaq tamamlanıb. İş üzrə toplanmış materiallar baxılması üçün Bakı Ağır Cinayətlər Məhkəməsinə göndərilib.

"Qafqazinfo"nun məlumatına görə, cinayətin ağırlığına görə cəmiyyətdə geniş müzakirə mövzusuna çevrilən iş hakim Səbinə Məmmədzadənin sədrliyi ilə araşdırılacaq.

Səbinə Məmmədzadə iki il əvvəl hakim təyin edilib. Xanım hakim fəaliyyəti ərzində ictimaiyyətin diqqət mərkəzində olan bir neçə cinayət işi üzrə hökm çıxarıb.

Qeyd edək ki, 25 yaşlı Əhməd Əhmədov valideynlərini, doqquz yaşlı qardaşını, bacısını və onun azyaşlı qızını xüsusi amansızlıqla öldürməkdə ittiham olunur. Ekspert rəyləri ilə onun hadisə törədərkən anlaqsız vəziyyətdə olduğu təsdiq edilib.