Cənubi Amerika Kuboku (Sudamerikana Kuboku) çərçivəsində Uruqvayda "Nasyonal" komandasına qarşı keçirilən matçdan qayıdan Argentinanın "Tigre" klubunun azarkeşlərini daşıyan avtobus Montevideoda atəşə tutulub.
Oxu.Az xəbər verir ki, bu barədə "El Pais" nəşrinin jurnalisti Xuan Pablo Romero "X" sosial şəbəkəsindəki hesabında paylaşım edib.
Hadisə turnirin 1/8 final mərhələsinə vəsiqə qazanmaq uğrunda baş tutan və "Tigre"nin 3:0 hesablı qələbəsi ilə yekunlaşan ilk pley-off oyunundan sonra qeydə alınıb.
Hücum nəticəsində bir nəfər ayağından xəsarət alaraq xəstəxanaya yerləşdirilib.
"Infobae" qəzetinin məlumatına əsasən, avtobusa motosikletdən 10 dəfə atəş açılıb.
Komandalar arasında cavab qarşılaşması iyulun 29-na keçən gecə Argentinada baş tutacaq.
