Mehmet Perinçek: “Ermənistan səmimiyyətini sübut etməlidir”

Ermənistan parlamentindəki hakim “Vətəndaş müqaviləsi” fraksiyasının üzvü Xaçatur Sukiasyan baş nazir Nikol Paşinyanın ardınca Ermənistanın Türkiyə və Azərbaycanla əməkdaşlıq etməli olduğunu bəyan edib.

Onun sözlərinə görə, əgər 2000-ci ildən sülh proqramı həyata keçirilməyə başlasaydı, bu gün Ermənistanda vəziyyət tamam başqa cür olardı.

Oxu.Az-a açıqlama verən türkiyəli tarixçi və politoloq Mehmet Perinçek qeyd edib ki, qonşularla münasibət qurmaq Ermənistan üçün məntiqli və düzgün addımdır:

“Regionda sabitliyin yaranması bütün qonşu ölkələr üçün faydalı olacaq, lakin hər şeydən əvvəl, təbii ki, bir çox ciddi iqtisadi, sosial və siyasi problemləri olan Ermənistan üçün. Ermənistana ilk növbədə Azərbaycan və Türkiyə ilə mehriban qonşuluq münasibətləri kömək edə bilər”.

Politoloq qeyd edib ki, indi erməni tərəfi öz səmimiyyətini sübut etməlidir.

“İrəvan ilk növbədə Azərbaycan və Türkiyənin ərazi bütövlüyünə hörmət etməli, yad torpaqlara iddialarından əl çəkməlidir. Aydındır ki, bu iddiaların Bakı və Ankara üçün heç bir təhlükəsi yoxdur, çünki Ermənistanın sadəcə olaraq hansısa əraziləri ələ keçirmək imkanları yoxdur. Amma yenə də söyləyirəm, İrəvanda olanlar öz səmimiyyətlərini sübut etməli və iddialarından imtina etdiklərini rəsmən bəyan etməlidirlər”, – deyə Mehmet Perinçek vurğulayıb.

Ekspert əlavə edib ki, Ermənistan 2020-ci il noyabrın 10-da Bakı, Moskva və İrəvan arasında imzalanmış sazişin bütün şərtlərinə əməl etməyə borcludur.

“Azərbaycanın ərazi bütövlüyü tam təmin edilməlidir. Əgər bütün məcburi tələblər yerinə yetirilərsə, bu, Ermənistan tərəfinin Ermənistan-Türkiyə və Ermənistan-Azərbaycan münasibətlərini yaxşılaşdırmaq istiqamətində səmimi istəyinin göstəricisinə çevriləcək. Xarici qüvvələrin burada münaqişələr törətmək istəyini nəzərə alsaq, Cənubi Qafqaz regionunda sabitliyin əldə edilməsi çox vacibdir. Ermənistan ona verilən dərsləri xatırlamalıdır və mən hesab edirəm ki, onlar bunu unutmayıblar. Əvvəllər Ermənistan öz eqoist məqsədlərini həyata keçirmək üçün Qərbin nəzarətində olan marionet ölkə idi. Amma bu, Ermənistanın və erməni xalqının maraqlarına zərbə vurdu”, - Mehmet Perinçek fikirlərini tamamlayıb.

Nair Əliyev