O, avtomobil idmanında sadəcə sürücü deyildi. Təkərlərin tüstüsü, mühərrikin gurultusu və inanılmaz drift hərəkətləri ilə milyonlarla insanı ekran qarşısına toplamağı bacarmışdı. Onun videoları yarış həvəskarlarından tutmuş avtomobillərlə maraqlanmayan insanlara qədər hər kəsin diqqətini çəkirdi. Lakin bir gün bütün bunlar qəfil sona çatdı.
Oxu.Az-ın "İdmandan kənar" rubrikasında bu dəfə dünyada "Gymkhana" videoları ilə tanınan, avtomobil idmanına fərqli nəfəs gətirən Ken Blokun həyat hekayəsindən bəhs edəcəyik.
İdmandan biznesə, biznesdən sükan arxasına
Kenneth Paul Blok 1967-ci il noyabrın 21-də ABŞ-nin Kaliforniya ştatının Lonq-Biç şəhərində anadan olub. Uşaqlıqdan skeytbord, BMX və snoubord kimi idman növlərinə maraq göstərib. Avtomobillər isə sonradan onun həyatında əsas yer tutmağa başlayıb.
Blokun adı ilk dəfə geniş auditoriyaya avtomobil yarışları ilə deyil, biznes fəaliyyəti ilə tanınıb. O, 1994-cü ildə Damon Way ilə birlikdə "DC Shoes" şirkətini qurub. Brend qısa müddətdə ekstremal idman növləri ilə maraqlananlar arasında populyarlıq qazanıb. 2004-cü ildə şirkət "Quiksilver"ə satılıb.
Bu satışdan sonra Blok diqqətini daha çox sevdiyi sahəyə - avtomobil idmanına yönəldib.
37 yaşında başlayan yarış karyerası
Ken Blok peşəkar ralli karyerasına 2005-ci ildə, 37 yaşında başlayıb. "Subaru" avtomobili ilə Rally America çempionatında çıxış edən idmançı debüt mövsümündə ilin ən yaxşı yeni sürücüsü seçilib.
2006-cı ildə "100 Acre Wood" rallisində ilk qələbəsini qazanan Blok sonrakı illərdə bu yarışda ardıcıl beş dəfə birinci olub. O, ABŞ ralli çempionatında ümumilikdə 23 qələbə əldə edib.
Blok Dünya Ralli Çempionatında da iştirak edib. 2013-cü ildə Meksika rallisini yeddinci pillədə başa vurması onun bu yarışdakı ən yaxşı nəticəsi olub. X Games yarışlarında isə beş medal qazanıb.
Bununla belə, onu dünya miqyasında məşhurlaşdıran təkcə idman nəticələri olmayıb.
"Gymkhana" ilə dünyanı heyrətləndirdi
Ken Blokun adını milyonlarla insana tanıdan əsas layihə "Gymkhana" videoları olub. O, avtomobili adi yarış traslarından kənarda, dar küçələrdə, sənaye ərazilərində və müxtəlif maneələrin arasında ustalıqla idarə edirdi.
2008-ci ildə yayımlanan ilk video qısa müddətdə böyük maraq doğurub. Blokun avtomobili idarəetmə bacarığı, dəqiq manevrləri və qeyri-adi hərəkətləri internetdə sürətlə yayılıb.
2012-ci ildə San-Fransiskoda lentə alınan "Gymkhana Five" layihəsi isə seriyanın ən məşhur işlərindən birinə çevrilib. Video yayımlandığı ilk 24 saat ərzində beş milyondan çox baxış toplayıb.
2018-ci ildə təqdim olunan "Gymkhana Ten" layihəsində Blok beş fərqli şəhərdə müxtəlif avtomobillərlə çıxış edib. Onun videoları ümumilikdə yüz milyonlarla baxış qazanıb.
Bu layihələr Ken Bloku sadəcə ralli sürücüsü deyil, avtomobil mədəniyyətinin internetdə ən tanınmış simalarından birinə çevirib.
"Hoonigan" və yeni layihələr
2010-cu ildə Ken Blok "Hoonigan Racing Division" komandasını yaradıb. O, karyerası ərzində "Subaru", "Ford" və "Audi" kimi markalarla əməkdaşlıq edib.
2022-ci ildə isə "Audi" ilə birlikdə elektrik avtomobili əsasında hazırlanan "Electrikhana" layihəsini təqdim edib. Bu video onun avtomobil dünyasındakı yeniliklərə açıq olduğunu bir daha göstərib.
Blok üçün avtomobil sadəcə nəqliyyat vasitəsi deyildi. O, sükan arxasında yaradıcılığını nümayiş etdirir, avtomobillə edilə biləcək hərəkətlərin sərhədlərini genişləndirməyə çalışırdı.
Qar uçqunu ilə gələn faciəli son
Ken Blokun həyatı 2023-cü il yanvarın 2-də faciəvi şəkildə başa çatıb.
ABŞ-nin Yuta ştatında qar motosikleti ilə gəzintiyə çıxan 55 yaşlı idmançı qəza nəticəsində həlak olub. Hadisə Vaşinqton dairəsində, Mill Hollow ərazisində baş verib. Rəsmi məlumatlara görə, qar motosikleti dik yamacda hərəkət edərkən çevrilərək onun üzərinə düşüb.
Hadisə yerinə gələn xilasedicilər Blokun aldığı xəsarətlərdən dünyasını dəyişdiyini müəyyənləşdiriblər.
Onun ölümü avtomobil idmanı ictimaiyyətində böyük kədərə səbəb olub.
Ken Blokdan geriyə nə qaldı?
Ken Blokun karyerası ənənəvi idmançı uğur hekayələrindən fərqlənirdi. O, yalnız çempionluqları və qələbələri ilə deyil, avtomobil idmanını milyonlarla insana sevdirən layihələri ilə yadda qalıb.
Onun "Gymkhana" videoları bu gün də izlənilir, avtomobil həvəskarları tərəfindən paylaşılır. Blok sübut edib ki, idman yalnız yarış meydançasında qazanılan medallardan ibarət deyil. Bəzən bir insanın yaratdığı üslub və ideya onun nəticələrindən daha uzunömürlü olur.
Ken Blok sükan arxasında sərhəd tanımayıb. Lakin onun hekayəsi 55 yaşında, heç kimin gözləmədiyi bir anda yarımçıq qalıb.
