28 
Okt
2022
12:36
59
125
1925
Virtual karabakh

Baş nazir Əli Əsədov Astanada MDB Hökumət Başçıları Şurasının iclasında iştirak edib - YENİLƏNİB + FOTO/VİDEO

28 Okt, 2022
12:36
1925

Baş nazir Əli Əsədov Astanada MDB Hökumət Başçıları Şurasının iclasında iştirak edib - YENİLƏNİB + FOTO/VİDEO

Bizim WhatsApp kanalımıza buradan abunə ola bilərsiniz

Qazaxıstanın paytaxtı Astanada Müstəqil Dövlətlər Birliyinin (MDB) Hökumət Başçıları Şurasının iclası keçirilib.

“Report” xəbər verir ki, Azərbaycanın Baş naziri Əli Əsədov iclasda iştirak edib.

İclasdan əvvəl Baş nazir Əli Əsədov və MDB Hökumət Başçıları Şurasının digər üzvləri Qazaxıstanın Prezidenti Kasım-Jomart Tokayevlə görüşüblər.

MDB Hökumət Başçıları Şurasının iclasında çıxış edən Baş nazir Ə.Əsədov qeyd edib ki, qlobal sosial-iqtisadi çağırışlar və onların mənfi nəticələrinin aradan qaldırılmasının zəruriliyi şəraitində Azərbaycan Respublikası MDB çərçivəsində qarşılıqlı faydalı tərəfdaşlığa və hökumət səviyyəsində məhsuldar sıx təmasların davam etdirilməsinə böyük önəm verir.

Qeyd olunub ki, ötən illər ərzində Birlik bir çox sahələrdə qarşılıqlı fəaliyyət üçün faydalı format kimi özünü sübut edib.

Diqqətə çatdırılıb ki, Azərbaycan MDB çərçivəsində iqtisadi əməkdaşlıqda fəal iştirak edir.

“Bizim demək olar ki, bütün üzv ölkələrlə sıx iqtisadi əlaqələrimiz var. Sevindirici haldır ki, pandemiya zəiflədikcə Azərbaycanın MDB-yə üzv olan dövlətlərlə xarici ticarətinin həcmində artım müşahidə olunur. Belə ki, bu il ticarət dövriyyəsi 30% artıb”, - deyə Ə.Əsədov bildirib.

Nəqliyyat sektorunda əməkdaşlığın mühüm əhəmiyyəti vurğulanıb.

Ə.Əsədov qeyd edib ki, Azərbaycanda milli iqtisadiyyatın intensiv inkişaf edən və perspektivli seqmenti kimi nəqliyyat sektoruna xüsusi diqqət yetirilir.

Azərbaycan öz nəqliyyat potensialını fəal şəkildə inkişaf etdirməklə “Şimal-Cənub”, “Şərq-Qərb”, Transxəzər Beynəlxalq Nəqliyyat Marşrutu kimi layihələrin həyata keçirilməsinə mühüm töhfə verir.

44 günlük müharibənin başa çatmasından sonra regionda yaranan yeni reallıqlar iqtisadi və nəqliyyat sahələrində əməkdaşlığın qurulmasına müsbət təsir göstərir.

Qeyd olunub ki, Qarabağ münaqişəsinə son qoyulması iqtisadi və kommunikasiya əlaqələrinin bərpası yolu ilə uzunmüddətli sülh və sabitliyə nail olmaq üçün yeni imkanlar yaradıb ki, bu da Birlik ölkələri də daxil olmaqla iqtisadi əməkdaşlığın genişlənməsinə töhfə verəcək.

Ə.Əsədov Azərbaycanın 2020-ci il 9/10 noyabr və 2021-ci il 11 yanvar tarixli üçtərəfli bəyanatlara, o cümlədən regional nəqliyyat kommunikasiyalarının bərpası üzrə üçtərəfli İşçi qrupun və Azərbaycan ilə Ermənistan arasında dövlət sərhədinin delimitasiyası və demarkasiyası üzrə Komissiyanın işinə sadiqliyini bir daha təsdiqləyib.

Zəngəzur dəhlizinin açılmasından sonra rayonun cəlbediciliyinin xeyli yüksələcəyi, bunun, tranzit imkanlarını bir neçə dəfə artıracağı və bütövlükdə investisiya mühitinin möhkəmlənməsinə xidmət edəcəyi diqqətə çatdırılıb.

Bildirilib ki, 2021-2022-ci illərdə Azərbaycan işğaldan azad edilmiş ərazilərin bərpası üçün təqribən 3 milyard ABŞ dolları məbləğində vəsait ayırıb, məcburi köçkünlərin öz doğma yurdlarına qaytarılması istiqamətində fəal iş aparılır.

“İşlərin miqyası və onların həyata keçirilmə müddəti bizim işğaldan azad edilmiş əraziləri bərpa etmək və inkişaf etdirmək əzmimizi əyani şəkildə nümayiş etdirir ki, bu da regionda münaqişədən sonrakı sabitliyə töhfə verir”, - deyə Ə.Əsədov əlavə edib.

12:21

MDB hökumət başçılarının növbəti iclası 2023-cü il iyunun 2-də Bişkekdə (Qırğızıstan) keçiriləcək.

Bu barədə MDB İcraiyyə Komitəsinin rəhbəri Sergey Lebedev bildirib.

“Qırğızıstan Respublikasının təklifi ilə MDB Hökumət Başçıları Şurasının növbəti iclasının 2023-cü il iyunun 2-də Bişkekdə keçirilməsi qərara alınıb”, - Lebedev bildirib.

10:14

Qazaxıstanın paytaxtı Astana şəhərində MDB Hökumət Başçıları Şurasının iclası başlayıb.

Məlumata görə, baş nazirlər 10-dan çox məsələni müzakirə etməlidirlər.

Görüşdən əvvəl iştirakçılar Qazaxıstan Prezidenti Kasım-Jomart Tokayevlə görüşüblər.

İclas dar və geniş tərkibdə keçiriləcək, ondan sonra sənədlərin imzalanması planlaşdırılır.

Tədbirdə Azərbaycanı Baş nazir Əli Əsədov təmsil edir.

Xatırladaq ki, hazırda MDB-yə Qazaxıstan sədrlik edir. 2023-cü ildən isə sədrlik Qırğızıstan Respublikasına keçəcək, Qazaxıstan və Rusiya həmsədr olacaqlar.

Bizimlə əlaqə saxlayın

Digər Siyasət xəbərləri