Ermənistanın Kamilə qoyduğu qadağa aradan qaldırıldı

Fitnes məşqçisi Kamil Zeynallıya Ermənistan tərəfindən qoyulan federal axtarış aradan qaldırılıb.

Oxu.Az-ın məlumatına görə, o bu barədə "Tarixin bir günü" verilişində məlumat verib.

Kamil Zeynallı bildirib ki, Azərbaycanın Rusiyadakı səfirlikdən ona zəng gəlib və qeyd olunub ki onun üzərinə qoyulan axtarış götürülüb:

"Bu yaxınlarda zəng gəldi ki, təbrik edirik, düşmənlər tərəfindən qoyulan axtarış üzərindən götürülüb. Bunu dövlətimiz edib. Tək mənim yox, bir neçə şəxsin üzərində olan axtarış aradan qaldırılıb".

Qeyd edək ki, Moskvada hava limanında saxlanılan fitnes məşqçisi Kamil Zeynallı 7-8 saat sonra sərbəst buraxılıb və Bakıya qayıdıb.

Ermənistan onu ölkənin Cinayət Məcəlləsinin 135 (insanlığa qarşı cinayətlər), 137 (müharibə cinayətləri), 140 (müharibə aparmaq üçün qadağan olunmuş üsullardan istifadə edən hərbi cinayətlər), 147 (muzdlu cəlb etmək) və 149-cu (təcavüz) maddələri ilə ittiham edib və onu federal axtarışa vermişdi.