"Azərbaycan Respublikası Prezident İlham Əliyevin rəhbərliyi ilə 2020-ci il sentyabrın 27-də başlayan Vətən müharibəsini özünün hərbi-siyasi qələbəsinə çevirə bildi. Sonrakı mərhələdə isə bu Qələbənin mühafizə edilməsi və daimi əsaslarla qorunması üçün vacib addımlar atıldı".
Bunu Oxu.Az-a Qarabağda antiterror tədbirlərinin üçüncü ildönümü ərəfəsində Azərbaycan QHT-lərinin ölkəmizdə akkreditə olunmuş diplomatik korpusun nümayəndələrinin işğaldan azad edilmiş ərazilərə səfəri ilə əlaqədar Ermənistanda başlanmış kampaniyanı şərh edən siyasi təhlilçi Aqşin Kərimov deyib.
Onun sözlərinə görə, Vətən müharibəsindən sonra regionda ümumilikdə geosiyasi hərəkətlər və motivasiyalar dəyişdi:
"Azərbaycan yeni motivasiyalarla regionda sülh yaradan tərəf olmaqla yanaşı, artıq qaydaları diktə edən statusda öz mövqeyini nümayiş etdirdi.
2020-ci ildən sonra Azərbaycan Respublikası suverenliyinin bərpası məsələsini sülh gündəminə uyğun olaraq diqqətdə saxlasa da, Qarabağdakı separatçı rejim və Ermənistanda ona altdan-altdan dəstək verilməsi prosesi ləngidirdi. Azərbaycan son müdafiə zərurətindən irəli gələrək, regionda üç ildən sonra antiterror tədbirləri keçirdi. Bu tədbirlər qazanılan zəfərin məntiqi davamı idi.
Əgər 2020-ci ildə Azərbaycan ərazi bütövlüyünü bərpa etmişdisə, 2023-cü ildə suverenliyini də təmin etməklə öz müdafiə və təhlükəsizlik konsepsiyasından irəli gələn vəzifələri icra etmiş oldu. Bu, əslində, beynəlxalq hüququn təminatı baxımından yeni bir presedentdir. O mənada ki, beynəlxalq hüquq və beynəlxalq münasibətlərdə hüquq yaratmaq istəyən güclər münaqişə dövründə real praktiki addımlar atmırlar və daha çox ikibaşlı bəyanatlar verərək, ikibaşlı mövqeləri diqqətə çatdıraraq status-kvonun uzanmasına səbəb olan mövqe nümayiş etdirirlər.
Azərbaycan isə silahlı vasitələrlə həm ərazi bütövlüyünü, həm də regionda separatizmin kökünü kəsərək suverenliyini təmin etdi. Bu, beynəlxalq hüquq üçün bir presedent, bir nümunədir. Bu nümunənin sonrakı mərhələlərdə Azərbaycanın mövqeyi baxımından necə görünməsinə diqqət yetirməliyik".
A.Kərimovun sözlərinə görə, təbii olaraq, burada bir vacib nüans önə çıxır: Azərbaycan artıq beynəlxalq münasibətlər sistemindəki reallıqları nəzərə alır və onun dəyişən nizama doğru getdiyini təhlil edərək özünün sülhyaratma modelini ortaya qoyur. Bu da Azərbaycanın orta güc kimi statusunu daha da qabağa apararaq onu yeni mərhələlərə çatdırır.
"Ermənistanın isə antiterror əməliyyatlarının ildönümü ərəfəsində Azərbaycana qarşı apardığı təbliğat kampaniyası diqqəti başqa yerə fokuslayır.
Birinci növbədə, Ermənistanda ictimai şüurun hələ də dəyişmədiyinə dəlalət edən informasiya əməliyyatlarını müşahidə etdik və "Bunun arxasında Ermənistan hakimiyyəti dayanırmı?" sualını dövriyyədə saxlamaq məcburiyyətində qaldıq. Çünki bir neçə məsələdə Ermənistan hakimiyyətinin erməni ictimai şüuruna təsirləri ilə bağlı versiyalar yaranır. Bununla da, ola bilsin ki, rəsmi İrəvan Azərbaycana qarşı olan revanşist kütləni aktiv cəbhə kimi saxlamağa çalışır. Digər tərəfdən isə erməni ideologiyasından irəli gələn ənənəvi taktika və metodların yenidən gündəmə gəlməsi suallar doğurur.
Azərbaycanın maddi, mədəni irsinə qarşı iddialarının yenidən gündəmə gətirilməsi o deməkdir ki, erməni ideologiyası və Ermənistandakı ictimai-siyasi şüur hələ də ciddi şəkildə əsaslı dəyişikliklərə məruz qalmayıb.
Bu isə bir daha Azərbaycanın Ermənistan Konstitusiyasının dəyişdirilməsi ilə bağlı tələbini aktuallaşdırır və növbəti danışıqlarda, yaxud diplomatik təmaslarda bunun daha da intensiv şəkildə qabardılacağını istisna etmək mümkün deyil. Çünki hüquqi baza qaldıqca erməni ictimai-siyasi düşüncəsində revanşist meyillər üçün barmaq yeri saxlanılacaq.
Ona görə də Azərbaycan sülhün məntiqi davamı olaraq, əldə edilmiş razılaşmaların mahiyyətindən irəli gələrək yeni tələblərini gündəmə gətirə bilər ki, Ermənistan da bununla bağlı real addımlar atmalıdır. Ermənistan hakimiyyətinin bu məsələdəki münasibəti, məncə, daha çox dekorativ bir xarakter daşıyır, yəni bir dekorasiyadır. Çünki İrəvan hakimiyyəti fürsət düşdükcə Azərbaycana qarşı hər hansı bir məsələnin öz xeyrinə dəyişdirilməsinə çalışa bilər və bu, istər analitik baxışlarda, istərsə də baş verən proseslərin məntiqində daha aydın izah oluna bilər", - deyə müsahibimiz fikrini yükunlaşdırıb.
