Azərbaycan Respublikasının Prezidenti İlham Əliyev sentyabrın 25-də dünyanın aparıcı investisiya şirkətlərindən olan "Brookfield Asset Management"in baş icraçı direktoru Konnor Teskini qəbul edib.
Oxu.Az xəbər verir ki, görüşdə dövlətimizin başçısının bu ilin yanvarında Davosda Konnor Teski ilə görüşü məmnunluqla xatırlanıb, Azərbaycan Respublikası Dövlət Neft Fondu (ARDNF) ilə "Brookfield Asset Management" arasında imzalanmış uzunmüddətli strateji əməkdaşlığa dair niyyət protokolunun əhəmiyyəti vurğulanıb.
Görüşdə Azərbaycanla şirkət arasında investisiya əməkdaşlığının genişləndirilməsi, xüsusilə enerji keçidi, bərpaolunan enerji, enerji saxlanc sistemləri və rəqəmsal infrastruktur sahələrində potensial layihələr müzakirə edilib. Azərbaycanın enerji potensialının ölkənin regional enerji mərkəzi kimi mövqeyinin möhkəmləndirilməsi baxımından əhəmiyyəti də qeyd olunub.
Qeyd edək ki, "Brookfield Asset Management" qlobal miqyasda alternativ investisiya idarəçiliyi ilə məşğul olan şirkətlərdən biridir. Şirkətin rəsmi məlumatına görə, onun idarə etdiyi aktivlərin həcmi 1 trilyon ABŞ dollarını ötür, şirkət isə 50-dən çox ölkədə fəaliyyət göstərir.
"Brookfield" uzunmüddətli investisiya strategiyası çərçivəsində pensiya fondları, suveren fondlar, sığorta şirkətləri, maliyyə institutları və digər institusional investorların kapitalını idarə edir.
Şirkətin fəaliyyət istiqamətləri arasında infrastruktur, bərpaolunan enerji və enerji keçidi, özəl kapital, daşınmaz əmlak və kredit əsas yer tutur. "Brookfield" özünü yalnız maliyyə investoru kimi deyil, investisiya etdiyi aktivlərin idarə edilməsində və inkişafında iştirak edən uzunmüddətli sahib-operator kimi təqdim edir.
Şirkətin xüsusilə infrastruktur sahəsindəki miqyası diqqət çəkir. "Brookfield"in rəsmi məlumatına əsasən, bu istiqamətdə şirkətin idarə etdiyi aktivlərin dəyəri 262 milyard dollar təşkil edir.
İnfrastruktur portfelinə 308 mindən çox telekommunikasiya obyekti, 77 min kilometr fiber-optik şəbəkə, 150 data mərkəzi, 36 300 kilometr dəmir yolu və 3 200 kilometr ödənişli avtomobil yolu daxildir. Kommunal infrastruktur biznesləri isə dünyada 10 milyondan çox istehlakçıya xidmət göstərir.
Enerji istiqamətində də şirkətin geniş portfeli var. "Brookfield"in məlumatına görə, onun enerji platformasının idarə etdiyi aktivlərin həcmi 144 milyard dollar, elektrik enerjisi istehsal gücü isə 46 min meqavatdır.
Portfelə hidroenerji, günəş və külək enerjisi, enerji saxlanc sistemləri, paylanmış enerji və digər texnologiyalar daxildir.
Şirkətin son illərdə diqqət yetirdiyi istiqamətlərdən biri də rəqəmsal infrastruktur və süni intellekt iqtisadiyyatının fiziki bazasıdır. "Brookfield" data mərkəzləri, fiber-optik şəbəkələr və telekommunikasiya infrastrukturu vasitəsilə rəqəmsal iqtisadiyyat üçün zəruri fiziki aktivlərə investisiya edir.
Şirkətin məlumatına görə, onun qlobal infrastruktur platformasında 150 data mərkəzi və 77 min kilometr fiber-optik şəbəkə mövcuddur.
"Brookfield" ilə Azərbaycan arasında əməkdaşlığın mühüm mərhələlərindən biri bu ilin yanvarında Davosda baş tutub.
Belə ki, yanvarın 21-də Prezident İlham Əliyev Konnor Teski ilə görüşüb. Görüş çərçivəsində ARDNF ilə "Brookfield Asset Management" arasında uzunmüddətli strateji əməkdaşlığa dair niyyət protokolu imzalanıb.
Sənədə əsasən, ARDNF-nin növbəti 3-4 il ərzində "Brookfield" tərəfindən idarə olunan fondlara və birgə investisiya layihələrinə 1.4 milyard ABŞ dollarınadək kapital qoyuluşu imkanlarının dəyərləndirilməsi nəzərdə tutulur.
Həmin əməkdaşlıq çərçivəsində Azərbaycanda enerji keçidi və enerji saxlancı, bərpaolunan enerji, rəqəmsal infrastruktur və digər investisiya potensialı yüksək olan sahələrin araşdırılması planlaşdırılıb.
Bu, "Brookfield"in Azərbaycana marağının yeni olmadığını da göstərir. Prezident İlham Əliyev 2023-cü ildə şirkətin o zamankı baş icraçı direktoru Brüs Flattı qəbul edib.
Həmin görüşdə də ARDNF ilə "Brookfield" arasında əməkdaşlığın genişləndirilməsi, Azərbaycanın yaşıl enerji potensialı və ölkənin regional enerji mərkəzinə çevrilməsi imkanları müzakirə olunub.
2025-ci ilin sentyabrında isə Prezident İlham Əliyev Nyu-Yorkda Brüs Flattla görüşüb. Həmin vaxt da tərəflər ARDNF ilə "Brookfield" arasında əməkdaşlığın inkişafını, Azərbaycanın bərpaolunan enerji potensialını və ölkənin regional enerji mərkəzinə çevrilməsi perspektivlərini müzakirə ediblər.
Konnor Teski "Brookfield Asset Management"in baş icraçı direktorudur. O, eyni zamanda şirkətin enerji istiqamətinə rəhbərlik edir və "Brookfield"in İcra Komitəsinin üzvüdür.
Şirkətin məlumatına görə, Teski 2012-ci ildə "Brookfield"ə qoşulub və müxtəlif investisiya və idarəetmə vəzifələrində çalışıb.
Beləliklə, Prezident İlham Əliyevin Konnor Teski ilə son görüşü yanvar ayında əldə olunan razılaşmaların davamı kimi diqqət çəkir.
Tərəflərin müzakirə etdiyi enerji keçidi, bərpaolunan enerji, enerji saxlancı və rəqəmsal infrastruktur isə həm "Brookfield"in qlobal investisiya strategiyasında, həm də Azərbaycanın investisiya gündəliyində əsas istiqamətlər sırasında yer alır.
