Cənubi Koreya prezidenti hərbi vəziyyətin tətbiqinə görə üzr istədi

Cənubi Koreya Prezidenti Yun Sok Yol hərbi vəziyyətin tətbiqinə görə ölkə vətəndaşlarından üzr istəyib.

Oxu.Az-ın verdiyi məlumata görə, bu barədə "Yonhap" xəbər verib.

Dövlət başçısı, həmçinin, hərbi vəziyyəti təkrar tətbiq etməyəcəyinə söz verib və məsuliyyət daşımağa hazır olduğunu bildirib.

Xatırladaq ki, Yun Sok Yol dekabrın 3-ü gecə saatlarında hərbi vəziyyət elan edib. O, bu qərarını KXDR-dən gələn təhdid və azad konstitusiya quruluşunun qorunması zərurəti ilə əsaslandırıb. Prezident, həmçinin, müxalifəti qiyama hazırlıq üzrə dövlətə qarşı fəaliyyətdə ittiham edib.

Dekabrın 4-nə keçən gecə təcili iclasda - Yun Sok Yolun müraciətindən cəmi 150 dəqiqə sonra - parlamentdə olan 300 deputatdan 190-ı prezidentdən hərbi vəziyyəti dərhal ləğv etməyi tələb etmək üçün səs verib. Dekabrın 4-ü səhər tezdən - yəni millətə müraciətindən cəmi beş saat yarım sonra Yun parlamentin qərarını qəbul edəcəyini və hərbi vəziyyəti ləğv edəcəyini bildirib.

Polis ölkə prezidentinə qarşı dövlətə xəyanət ittihamı üzrə araşdırmaya başlayıb.