"Fransa hakimiyyəti Qvadelupda uzun illər ərzində mədəni və informasiya sahələrini nəzarətdə saxlayıb".
Oxu.Az xəbər verir ki, bu fikirləri "Qvadelupun Dekolonizasiyasına Doğru! Çağırışlar və Perspektivlər" adlı beynəlxalq tematik konfransda çıxışı zamanı "Müstəmləkələşdirilmiş Qvadelupda mətbuatın tarixi" mövzusunun tədqiqatçısı, jurnalist Danik Zandronis deyib.
"1960-cı illərin sonunadək dövlət radiosu hər səhər Fransa milli himni "La Marseillaise"i (Marselyeza) yayımlayırdı. Həmin vaxt yalnız bir radio fəaliyyət göstərdiyindən, Qvadelup xalqı bu himni dinləməyə məcbur idi. Bu da zehni asılılığın bir göstəricisidir", - deyə Zandronis bildirib.
Jurnalist qeyd edib ki, o dövrdə Qvadelupda yayımlanan proqramlar yalnız fransız musiqilərindən ibarət olub:
"Halbuki həmin radio coğrafi olaraq Qvadelupda yerləşsə də, Fransa radiosu idi. Yerli musiqiyə efirdə yer verilmirdi. Bu isə mədəniyyətin planlı şəkildə sıxışdırıldığını və kolonial təsirin dərinliyini açıq göstərir".
D.Zandronis, həmçinin Qvadelupda informasiya məkanının da fransız nəzarətində olduğunu bildirib:
"Qvadelupda "France-Antilles" adlı yeganə gündəlik qəzet fəaliyyət göstərir. Bu media orqanı bu gün də mövcuddur və kolonial sistemin bir aləti kimi çıxış edir. Seçki dövrlərində isə bu qəzet Fransa müstəmləkəçiliyinin təbliğat vasitəsinə çevrilir".
Jurnalist çıxışında Fransanın bağladığı, lakin fəaliyyətini müstəqil şəkildə davam etdirməyə çalışan yerli radiolardan da bəhs edib:
"Təəssüf ki, bu cür təşəbbüslər imkan çatışmazlığı səbəbindən uzunömürlü olmur. Lakin biz müstəmləkəçiliyə qarşı mübarizəmizi davam etdiririk. Çünki Qvadelupda bizim milli kimliyimizi və mədəni varlığımızı sıradan çıxarmağa çalışırlar".
Aləmdə Nəsib
