İnsan Hüquqları Cəmiyyətinin prezidenti: "Boneyr xalqı beynəlxalq dəstəyə güvənir"

"Boneyr xalqı öz müqəddəratını təyinetmə hüququnu təmin etmək üçün beynəlxalq ictimaiyyətin dəstəyinə arxalanır".

"Report" xəbər verir ki, bunu Boneyr İnsan Hüquqları Cəmiyyətinin prezidenti Davika Jasmin Bissesar "Boneyr adasının Bakıdan keçən BMT Baş Assambleyasındakı öz müqəddəratını təyinetmə yolu" adlı konfransda deyib.

"Boneyr zəngin mədəni irsə malik kiçik bir adadır. Lakin dünyanın bir çox cəmiyyətlər kimi biz də problemlərlə üzləşirik. Xalqımızın öz müqəddəratını təyin etmək, özünəməxsusluğunu qorumaq və inkişaf etməklə bağlı hüquqları bizim missiyamızın əsasını təşkil edir", - o bildirib.

Onun sözlərinə görə, beynəlxalq ictimaiyyətin səsləri onların mübarizəsindəki vəziyyəti xeyli dəyişə bilər:

"Kiçik cəmiyyətlərin hüquqları böyük xalqların hüquqları qədər vacibdir".