Mikayıl Cabbarov "Yüksəliş" müsabiqəsinin qalibləri ilə görüşdü

İqtisadiyyat naziri Mikayıl Cabbarov üçüncü "Yüksəliş" müsabiqəsinin qalibləri Əsəd Qurbanzadə və Fərid İsayevlə görüşlər keçirib.

Oxu.Az xəbər verir ki, bu barədə İqtisadiyyat Nazirliyindən məlumat verilib.

Bildirilib ki, görüşdə iqtisadiyyat naziri dövlət başçısı İlham Əliyevin Sərəncamı ilə yaradılmış "Yüksəliş" müsabiqəsinin ölkəmizdə kadr potensialının zənginləşdirilməsi istiqamətində mühüm rol oynadığını vurğulayıb. Mentorluq proqramı çərçivəsində Nazirliyin və özəl şirkətlərin nümayəndələri ilə təşkil edilən görüşlərin idarəçilikdə effektivliyin yüksəldilməsi, strateji yanaşma və digər istiqamətlərdə qaliblərin bilik və bacarıqlarının artırılmasına hədəfləndiyi qeyd edilib.

Gənclər keçirilən görüşlərdə ölkəmizdə sahibkarlığın inkişafı, rəqəmsallaşma, innovativ həllərin və texnologiyaların tətbiqi, vergi islahatları, sənaye zonalarında beynəlxalq və yerli tərəfdaşlarla əməkdaşlıq, işğaldan azad edilən ərazilərdə iqtisadiyyatın sürətli inkişafı məqsədilə görülmüş işlərlə bağlı ətraflı məlumat aldıqlarını bildiriblər. Mentorluq proqramının resursların səmərəli istifadəsi, strateji layihələrin icrası və tərəfdaşlarla əlaqələrin qurulması baxımından səmərəli təcrübə olduğu nəzərə çatdırılıb.

Görüşdə gənclərin fərdi və peşəkar inkişaf sahəsində əldə etdikləri nəticələr müzakirə edilib, bilik və bacarıqlarının artırılması ilə bağlı tövsiyələr verilib. Mentilərə gələcək fəaliyyətlərində uğurlar arzulanıb.

18:16

"Müasir dövr insan kapitalının davamlı inkişafı və yeni keyfiyyət mərhələsinə transformasiyası ilə səciyyələnir".

Oxu.Az xəbər verir ki, bu barədə iqtisadiyyat naziri Mikayıl Cabbarov öz "X" hesabında paylaşıb.

"Kadr potensialının zənginləşdirilməsi istiqamətində Prezident İlham Əliyev tərəfindən təsis edilmiş "Yüksəliş" müsabiqəsi mühüm rol oynayır. "Yüksəliş 3" müsabiqəsinin qalibləri Fərid İsayev və Əsəd Qurbanzadə üçün İqtisadiyyat Nazirliyi tərəfindən hazırlanmış Mentorluq proqramı uğurla yekunlaşdı. Gənclərlə görüşümüzdə müsabiqənin karyera irəliləyişi üçün yaratdığı imkanlar, fərdi və peşəkar inkişaf sahəsində əldə etdikləri nəticələr barədə danışdıq. Mentorluq proqramının həyata keçirilməsində fəal iştirak edən həmkarlarımıza dərin təşəkkürümüzü bildirir, mentilərimizə isə gələcək fəaliyyətlərində uğurlar və davamlı yüksəliş arzulayırıq", - paylaşımda deyilir.

Müasir dövr insan kapitalının davamlı inkişafı və yeni keyfiyyət mərhələsinə transformasiyası ilə səciyyələnir. Kadr potensialının zənginləşdirilməsi istiqamətində Prezident cənab İlham Əliyev (@azpresident) tərəfindən təsis edilmiş "Yüksəliş" (@yukselish_az) müsabiqəsi mühüm rol… pic.twitter.com/lH2rr0FKEV

— Mikayil Jabbarov (@MikayilJabbarov) December 23, 2024