"1984-cü ilin iyun ayında Amritsarda baş verən hadisələr siqh tarixində dərin izlər buraxmış ağrılı və sarsıdıcı bir dövrdür. Bununla yanaşı, həmin hadisələr siqh xalqının dözümlülüyünün və iradəsinin də simvoluna çevrilib. Bu gün biz dünyada həmrəylik göstərən tərəfdaşlar axtarırıq və Xalistan uğrunda davam edən mübarizəmizdə dəstək qazanmağa çalışırıq. Bu mübarizə siqh xalqı üçün müstəqil və suveren dövlətin yaradılması məqsədini daşıyır".
Oxu.Az xəbər verir ki, bunu Beynəlxalq Siqhlər Federasiyasının sədri Moninder Sinqh Bakı Təşəbbüs Qrupunun (BTQ) təşkilatçılığı ilə keçirilən "İyun 1984, Amritsar hadisələri: Hindistanın etnik azlıqlara qarşı transmilli repressiyaları soyqırım kontekstində" adlı beynəlxalq konfransda jurnalistlərə açıqlamasında deyib.
O bildirib ki, 1984-cü ilin iyun hadisələri zamanı on minlərlə insan həyatını itirib:
"Ardınca isə həmin ilin noyabr ayında siqh soyqırımı baş verdi və yenidən Hindistanın müxtəlif bölgələrində on minlərlə siqh qətlə yetirildi. Kişilər, qadınlar, uşaqlar və yaşlılar, bir sözlə heç kim bu zorakılıqdan kənarda qalmadı. Bu faciələr siqh icmasında belə bir anlayışı daha da gücləndirdi ki, Hindistandan ayrılmaqdan başqa çıxış yolumuz yoxdur".
"Hazırda Azərbaycanda, Bakıda keçirilən bu tədbirləri biz qlobal həmrəyliyin nümunəsi kimi qiymətləndiririk. Azərbaycanla bizim dərin tarixi əlaqələrimiz var. Yüz illər boyunca siqh səyyahları və dini liderləri bu torpaqlara səfər ediblər. Biz yaxın gələcəkdə Bakı Təşəbbüs Qrupu və Azərbaycan hökuməti ilə Atəşgah məbədi kimi tarixi məkanlarla bağlı əməkdaşlıq və qarşılıqlı anlaşma əldə etməyə ümid edirik. Siqh dini liderləri və şəxsiyyətləri vaxtilə həmin məbəddə qalıblar. Məbədin divarlarında bizim dilimizdə - pəncab dilində yazılmış kitabələr də mövcuddur. Buna görə də Azərbaycan və bu torpaqla həqiqətən dərin bağlarımız var. Azərbaycan xalqına və bu bölgəyə minnətdarıq ki, bizə 1984-cü ilin iyun qırğınları, baş vermiş soyqırımı, siqh xalqının suverenlik uğrunda apardığı müasir mübarizə haqqında danışmaq imkanı yaradıblar. Eyni zamanda, soyqırımı və işgəncələrin qurbanı olmuş insanların səslərinin eşidilməsinə, adlarının unudulmamasına və hekayələrinin dünya ictimaiyyətinə çatdırılmasına şərait yaradılıb", - deyə nümayəndə əlavə edib.
