Nigar Məmmədova: "Qlobal Cənub ölkələrinin əməkdaşlıq potensialından istifadə etməliyik"

"Güc mərkəzinə çevrilməkdə olan Qlobal cənub ölkələri haqlı olaraq hegemonluğa, ikili standartlara qarşı çıxır, beynəlxalq münasibətlər sistemində öz təmsilçiliyini artırmağa, səsini effektiv şəkildə gücləndirməyə çalışır".

Oxu.Az xəbər verir ki, bunu Milli Məclisin deputatı Nigar Məmmədova parlamentin Beynəlxalq münasibətlər və parlamentlərarası əlaqələr komitəsinin "Qlobal Cənubun yüksəlişi və Qərb: Azərbaycanın rolu, əməkdaşlıq və inkişaf üçün yeni imkanlar" mövzusunda keçirdiyi dinləmədə deyib.

O bildirib ki, Azərbaycanın Qlobal Cənubla bağlı mövqeyi aydındır:

"Rəsmi Bakı inkişaf etməkdə olan ölkələrin hüquq və mənafelərini qoruyur. Biz BMT Nizamnaməsinin məqsəd və prinsiplərinə əsaslanan beynəlxalq münasibətlərin əsas normalarının qorunmasının tərəfdarıyıq. Biz əməkdaşlıq potensialını insanların rifahına xidmət edən nəticələrə çevirməyi təşviq edirik. "Qlobal Cənubla strateji dialoq gücləndirilməli, yeni əməkdaşlıq mexanizmləri düşünülməlidir. Regionlararası və subregional əməkdaşlığın yeni modelləri fəal şəkildə araşdırılmalı, yeni təşəbbüslər, yeni platformalar və yeni qaydalar təqdim etməklə Qlobal Cənub ölkələrinin əməkdaşlıq potensialından istifadə etməliyik. Beyin mərkəzləri, media, vətəndaş cəmiyyəti vasitəsilə etimadı artırmaq mümkündür".

"Prezident İlham Əliyevin də söylədiyi kimi, Azərbaycan Qlobal Cənubun güclü səsinə çevrilib. Ölkəmiz Qlobal Cənubla Qlobal Şimal arasında fəal dialoq, o cümlədən qarşılıqlı anlaşma mühiti yarada bilib. Ölkəmiz bütövlükdə Qlobal Cənubun üzləşdiyi problemlərin həllinə töhfə verir. Təəssüf ki, Qlobal Cənub ölkələrinin bir qismi neokolonializmdən əziyyət çəkir. Rəsmi Bakı neomüstəmləkəçiliyin bütün formalarını və təzahürlərini rədd edir. Məhz Bakıdan başlayan beynəlxalq təşəbbüs, neokolonializmə qarşı "Bakı Təşəbbüsü" öz nəticələrini verməkdədir".

Mərahim Nəsib