"Xəzər dənizi ilə bağlı məsələlər həm Azərbaycan, həm də Qazaxıstan üçün son dərəcə vacibdir".
Oxu.Az xəbər verir ki, bu sözləri Qazaxıstanın Azərbaycandakı səfiri Alim Bayel Baku TV-yə müsahibəsində deyib.
Səfir bildirib ki, Xəzər beynəlxalq nəqliyyat marşrutlarının keçdiyi mühüm məkandır, bu dənizdə suyun səviyyəsinin azalması ciddi narahatlıq doğurur.
O vurğulayıb ki, Qazaxıstan və Azərbaycan hazırda Xəzər dənizinin problemlərini fəal şəkildə müzakirə edirlər və bu məsələnin apreldə Qazaxıstanda keçiriləcək sammitdə geniş şəkildə müzakirə olunacağı gözlənilir:
"Ümid edirik ki, həmin sammitdə cənab Prezident İlham Əliyev də iştirak edəcək. Bir sıra ekoloji problemlər, o cümlədən Xəzər dənizinin problemləri müzakirə olunacaq".
Qazaxıstanın ətraf mühitin mühafizəsi və təbii sərvətlərdən səmərəli istifadə məsələlərinə böyük önəm verdiyini vurğulayan səfir qeyd edib ki, yaxın vaxtlarda ölkəsində yeni konstitusiyanın qəbuluna dair ümumrespublika referendumu keçiriləcək:
"Konstitusiyada ilk dəfə olaraq vətəndaşların təbiəti qorumaq və təbii sərvətlərə qayğı ilə yanaşmaq öhdəliyi təsbit ediləcək".
Səfir həmçinin Birləşmiş Millətlər Təşkilatı çərçivəsində beynəlxalq su təşkilatının yaradılması təşəbbüsünü də qeyd edib:
"Ümid edirik ki, bu qurum yaradılarsa, beynəlxalq ictimaiyyətin su ilə bağlı bütün məsələlər üzrə səylərin koordinasiyası mümkün olacaq. Azərbaycanın da bu təşəbbüsü dəstəkləyəcəyinə çox ümid edirik".
