Azərbaycanda müqəddəs Ramazan ayı başlayıb. Bu ay təkcə oruc və ibadət deyil, həm də birlik, paylaşma və sosial həmrəylik rəmzi hesab olunur. Lakin paytaxt restoranlarının təklif etdiyi iftar menyularının qiymətləri cəmiyyətdə ciddi müzakirələrə və narazılığa səbəb olub.
Bu barədə Baku TV-nin videomaterialında bildirilir.
Aparılan müşahidələr göstərir ki, müxtəlif iaşə obyektlərində birnəfərlik iftar menyusunun qiyməti geniş diapazonda dəyişir:
- Minimal paket: 15 manat (şorba, salat, əsas yemək, limitsiz çay və kompot),
- Orta seqment: 50-60 manat (açıq bufet, limitsiz yemək seçimi),
- Premium paket: 85-100 manat (dəniz məhsulları, kabablar və lüks xidmət).
Sakinlər yüksək qiymətlərin Ramazan ayının ruhuna zidd olduğunu bildirirlər. Vətəndaşların fikrincə, 90-100 manatlıq bir menyunu bitirmək üçün insan normalda 5-6 kiloqram yemək yeməlidir ki, bu da həm fiziki, həm də maddi cəhətdən məntiqsizdir.
Məsələyə münasibət bildirən ilahiyyatçı Turan İrfan qeyd edir ki, Ramazan sosial bərabərlik ayıdır, ayrı-seçkilik vasitəsi deyil. Onun sözlərinə görə, dəbdəbəli iftar süfrələri bir növ israfçılıqdır:
"100-150 manatlıq iftar menyuları təklif etməklə insanları yanlış yola sövq edirlər. Bir tərəfdə iftarını açmağa çörək tapmayan insanlar, digər tərəfdə bu cür israfçılıq... Maddi gəlir naminə dini dəyərlərdən istifadə edən şəxslər mənəvi baxımdan xəyanət etmiş sayılırlar".
Terapevt Abbas Bağırov isə iftarda limitsiz və ağır yeməklərdən istifadənin orqanizm üçün ciddi fəsadlar yarada biləcəyini vurğulayır. Həkim bildirir ki, eyni vaxtda müxtəlif növ ağır təamların qəbulu həzm prosesini çətinləşdirir:
"İftar açıldıqdan bir neçə dəqiqə sonra şorba kimi yüngül yeməklərdən istifadə olunması məqsədəuyğundur. Ağır yeməklərin eyni vaxtda qəbulu orqanizmin yorulmasına səbəb olur. Yeməklərin müəyyən fasilələrlə qəbul edilməsi tövsiyə olunur".
