"Vaşinqtonda Azərbaycan Prezidenti, Amerika Birləşmiş Ştatlarının prezidenti və Ermənistanın baş naziri tərəfindən Birgə Bəyannamə imzalandı və sülh sazişi paraflanmaqla yekun sülh sazişi istiqamətində mühüm addım atıldı. Bu hadisədən sonra Ermənistandakı Avropa İttifaqının dırnaqarası müşahidəçi missiyası artıq mahiyyətini itirir".
Bu fikirləri Oxu.Az-a açıqlamasında deputat Aqil Abbas deyib.
O bildirib ki, artıq "müşahidəçi missiyası"nın fəaliyyətinə ehtiyac qalmadı:
"Onsuz da həmin missiya məzmunsuzluğu ilə fərqlənirdi. Çox keçmədən mövcudluğunu itirəcəyi gözlənilən idi.
Vaşinqtondakı proseslərin nəticəsinə gəldikdə, söhbət təsadüfi bir razılaşmadan getmir. İmzalanan sənəd ABŞ Prezidenti tərəfindən də təsdiqlənib və bu, qarşıdakı sülh prosesinə beynəlxalq zəmanət verən mühüm diplomatik addımdır. Dünya miqyasında olan önəmli bir dövlətin rəhbərinin bu prosesə imza atması, onun məsuliyyətini öz üzərinə götürməsi xüsusi əhəmiyyət daşıyır".
Deputat əlavə edib ki, bu saziş bölgədə vəziyyəti köklü şəkildə dəyişəcək:
"Bütün Azərbaycan xalqı bu xəbəri böyük maraq və səbirsizliklə izləyirdi. Dünən bütün çıxışlara baxdım. Xüsusilə Cənab Prezidentin Vaşinqtondakı nitqləri məni qürurlandırdı. O, sərbəst, inamlı danışır, diplomatik məharətini nümayiş etdirirdi. Hətta verilən suallara əlavə izahlar gətirərək Azərbaycanın mövqeyini dəqiq və açıq şəkildə çatdırdı. Onun bu qədər rahat, özünə güvənən davranışı mənim üçün qürur mənbəyi oldu. Bizim doğrudan da müdrik Prezidentimiz var. Donald Tramp da bunu dəfələrlə qeyd etdi. İnanıram ki, bu sülhün təminatı sarsılmaz, ölkələrimizin gələcəyi parlaq olacaq".
A.Abbas sonda qeyd edib ki, Ermənistanda müəyyən dəyişikliklərin baş verəcəyi aydındır:
"Paşinyan artıq anlayır ki, Ermənistan yalnız Azərbaycanla sülh şəraitində inkişaf edə bilər. Buna görə də hər iki tərəfin qarşılıqlı əməkdaşlığa hazır olması bölgənin sabitliyi üçün vacib şərtdir".
Məhərrəm Əliyev
