Böyükşor gölü ərazisində mərkəzləşdirilmiş kanalizasiya sistemi olmadığından, tullantı sularının bir qisminin sözügedən gölə axıdılması iddiası ilə bağlı analizlərin nəticələri açıqlanıb.
Suların İstifadəsinə və Mühafizəsinə Dövlət Nəzarəti Xidmətindən Oxu.Az-ın sorğusuna cavab olaraq bildirilib ki, Böyükşor gölündən fevralın 2-də Suların İstifadəsinə və Mühafizəsinə Dövlət Nəzarəti Xidmətinin tabeliyində Mərkəzi laboratoriya tərəfindən götürülmüş su nümunələrinin analiz nəticələrinə əsasən, göldə yeni fekal çirklənmə, yəni kanalizasiya sularının axıdılması faktı təsdiqlənmir.
Məlumatda qeyd olunub ki, göl suyunda ammonium ionunun qatılığının aşağı olması yeni fekal çirklənmənin olmadığına dəlalət edir:
"Göl suyunun mühit reaksiyasının qələvi olması və səthi aktiv maddələrin aşkarlanması suda daha çox yuyucu vasitələrin (detergentlər) mövcudluğunu göstərir.
Yüksək elektrik keçiriciliyi, həll olmuş duzların və xloridlərin yüksək miqdarı küləksiz günlərdə səthi aktiv maddələrin suda qeyri-aktiv formada olmasına səbəb olur. Küləkli hava şəraitində isə suyun mexaniki qarışması və hava ilə təmasının artması nəticəsində səthi aktiv maddələr səthdə toplanaraq köpük əmələ gətirir. Bu, sabunlu sular üçün tipik olan fiziki reaksiya ilə şərtlənən köpüklənmə effektidir, yəni ani çirklənmə hadisəsi deyil.
Məlumat üçün bildiririk ki, Dərnəgül-Bakıxanov-Qaraçuxur-Hövsan xətti üzrə inşasına başlanılmış 10.4 km-lik kollektorun, həmçinin Biləcəri, Binəqədi, M.Ə. Rəsulzadə, Mehdiabad və Digah xətti üzrə 16 km-lik gətirici kollektorun və məhsuldarlığı 40 000 m³/gün olan qurğunun tikintisi, habelə Azərbaycan Respublikası Prezidentinin müvafiq sərəncamı ilə təsdiq edilmiş "Bakı şəhərində və Abşeron yarımadasında sutəchizatı, yağış və tullantı suları sistemlərinin təkmilləşdirilməsinə dair 2026-2030-cu illər üzrə Dövlət Proqramı"nda nəzərdə tutulmuş tədbirlərin yerinə yetirilməsi təmin ediləcək. Nəticədə ətraf ərazilərdə formalaşan tullantı suları idarə olunacaq və Böyükşor gölünün ekoloji vəziyyəti yaxşılaşacaq".
Məhərrəm Əliyev
