Deputatdan təklif: "Səhiyyə sahəsində reklamın aparılması qəti qadağan edilsin"

"Səhər saatlarından etibarən radiolardan və telekanallardan xəstəliklərin adı və onların simptomları təlaşlandırıcı bir formada, həyəcanlı səslə və musiqinin müşayiəti ilə davamlı olaraq təkrarlanır. İnsanlara psixoloji təzyiq göstərilir və onlara xəstə olduqları aşılanır. Hətta tamamilə sağlam insan belə total psixoloji təzyiqin altında özünün xəstə olduğunu düşünə bilər".

Oxu.Az xəbər verir ki, bunu Milli Məclisin bugünkü plenar iclasında deputat Elçin Mirzəbəyli deyib.

Onun sözlərinə görə, Rusiyada 2014-cü ildən dərman vasitələrinin, tibbi xidmətlərin, o cümlədən profilaktika və diaqnostikanın, müalicə və tibbi reabilitasiya üsullarının, habelə istifadəsi xüsusi hazırlıq tələb edən tibbi məhsulların reklamı qadağan edilib:

"Qardaş Türkiyənin isə "Həkimlik Peşəsi Etik Qaydaları"nın 11-ci maddəsində deyilir:

"Həkim məsləkini yerinə yetirərkən reklam edə, ticari reklamlara vasitə ola, insanları təlaşlandıran, yanlış yönləndirən, haqsız rəqabətə yol açan davranışlara yol verə bilməz. Bu baxış bucağı Türkiyənin tibb, reklam və istehlakçıların hüquqları ilə bağlı bütün qanunvericilik aktlarında yer alıb və problem kökündən, birdəfəlik həll olunub. Bu səbəbdən də eyni problemlərin aradan qaldırılması üçün məsələnin hissə-hissə yox, birdəfəlik həll edilməsinin zəruriliyini və qardaş Türkiyənin tibb sahəsindəki hüquqi-normativ aktlarının izahında bildirildiyi kimi, bütün müvafiq hüquqi və etik qaydalara uyğun olaraq, səhiyyə sahəsində reklamın aparılmasının qəti qadağan edilməsinin vacib olduğunu düşünürəm".

Mərahim Nəsib