Kirill Qaburiç: "Ölkələr gücü ilə deyil, səhiyyə sistemi ilə öyünməlidirlər"

"Qlobal böhran yalnız iqtisadi və siyasi deyil, həm də ünsiyyət və qarşılıqlı əməkdaşlıq sahələrində ciddi problemlər yaradır".

Oxu.Az xəbər verir ki, bunu "Dünya düzəninin yenidən düşünülməsi: Çağırışların fürsətlərə çevrilməsi" adlı XII Qlobal Bakı Forumunda "Qlobal Səhiyyə Böhranda: Hazırlılıq və Bərabərlikdə Yeni Cəbhələr" adlı panel müzakirədə Moldovanın sabiq baş naziri Kirill Qaburiç deyib.

"Biz COVID pandemiyasından özümüz üçün dərslər çıxarmışıq, lakin düşünməliyik ki, oxşar hallar baş verərsə, həmin həllər yenə də yararlı olacaqmı?" - deyə o fikrini davam etdirib.

Qaburiç səhiyyə sahəsinə investisiyaların artırılmasının vacibliyini vurğulayıb. O qeyd edib ki, digər sahələrə yönəldilən sərmayələr sürətlə artsa da, səhiyyə sahəsinə ayrılan vəsaitlər sabit qalır:

"Kiçik və orta miqyaslı ölkələr var ki, onlar səhiyyə sahəsində lazımi dəstəyi ala bilmirlər. Müharibə ilə yanaşı, tibbi xidmətə çıxışı olmadığı üçün həyatını itirən insanlar var. Tibbi ləvazimatlara və dərman preparatlarına çıxış bərabərləşdirilməlidir".

O, özəl sektorun səhiyyə sistemində iştirakının artırılmasını dəstəklədiyini bildirib və bunun effektivliyini vurğulayıb:

"Dəfələrlə sübut olunub ki, səhiyyədə özəl sektorun iştirakı effektiv nəticələr verir. Hökumətlər də bu prosesdə müəyyən mənada dəstək göstərməlidirlər".

Sonda Qaburiç ölkələrin hərbi gücünə deyil, səhiyyə sisteminin gücləndirilməsinə üstünlük verməsinin vacibliyini qeyd edib:

"Ölkələr gücü ilə öyünür, nəinki səhiyyə sistemi ilə. Biz başa düşməliyik ki, gücün nə qədər böyük olması yox, onun sağlam dünya üçün nə qədər səmərəli olmasına baxmalıyıq".

Aləmdə Nəsib