Məhərrəm Abbasov: "Naxçıvanda birgünlük karbon emissiyasını sıfıra endirmişik"

"Ölkə olaraq qarşımıza qoyulan əsas məqsədlərdən biri də 2050-ci ilə qədər atmosferə buraxılan karbon emissiyalarını 40 faizə qədər azaltmaqdır. Təbii ki, yaşıl enerjidən nə qədər geniş istifadə olunarsa, atmosferə buraxılan karbon qazı da azalmış olar".

Bu fikirləri Oxu.Az-a açıqlamasında Naxçıvan Muxtar Respublikası Dövlət Energetika Xidmətinin rəis müavini, rəis vəzifələrini müvəqqəti icra edən Məhərrəm Abbasov deyib.

O bildirib ki, hazırda enerji istehsalında yaşıl enerjinin payının 55 faizə çatması atmosferə buraxılan karbon qazını da ötən illərə nisbətən dəfələrlə azaldılması deməkdir:

"Hətta biz Dövlət Energetika Xidməti olaraq birgünlük Naxçıvanda karbon emissiyasını sıfıra endirmişik.

Oktyabrın 11-də muxtar respublikanın 947 508 kVt-saat elektrik enerjisinə tələbatı tam yaşıl enerji hesabına ödənilib. Digər günlərlə müqayisədə təqribən 130 min kubmetr həcmində təbii qaza qənaət edilib, həmin gün karbon emissiyası sıfıra düşüb".

Məhərrəm Əliyev