Həyat yoldaşını çox sayda bıçaq zərbəsi ilə qətlə yetirməkdə təqsirləndirilən Firuz Qasımovun cinayət işinin məhkəməsinin növbəti iclası keçirilib.
Oxu.Az-ın məlumatına görə, Bakı Ağır Cinayətlər Məhkəməsinin hakimi Hafiz Kamranovun sədrliyi ilə keçirilən baxış iclasında qətlə yetirilən Günel Abbasovanın qardaşı və bacısı şahid qismində ifadə veriblər.
Zəminə Abbasova ifadəsində bildirib ki, Firuz Qasımov onun bacısına qarşı həmişə zorakılıq edib.
"Onun bacıma qarşı etmədiyi zülm qalmamışdı. Uşaqları azyaşlı olduqları üçün boşana bilmirdi. Hadisə günü işdə olmuşam. Bizə gələn yolda bacımın qarşısını kəsib vurmuşdu onu. Polislər mənə zəng eləmişdilər. Bacım ondan boşanmaq istəyirdi, o isə boşanmağa imkan vermirdi. Mən hadisə yerinə gələndə bacım qanın içində yerdə uzanmışdı".
Şahid Aqil Abbasov öldürülən Günel Abbasovanın qardaşı olduğunu bildirərək, təqsirləndirilən Firuz Qasımovun Bakıya gəldiyi ərəfədə Binə qəsəbəsində olduğunu deyib:
"Firuzun hər dəfəsində Güneli təhdid edib gün vermədiyini eşidib onu söhbət etməyə çağırdım, həyatına bir düzən verməsini söylədim. Mənə dedi ki, ev tutmuşam, ailəmi və uşaqlarımı başıma yığmaq istəyirəm. Söhbətimiz vaxtı böyük oğulları da yanımızda idi. Anamla gedib evə baxdıq, yaşanılası yer deyildi: 9 kvadratmetrlik otaq, bərbad gündə olan mətbəx və hamam. Firuz burada müvəqqəti qalacaqlarını dedi. Mən də onlara kömək edəcəyimə söz verdim. Firuz bacımı həmişə döyürdü, hətta öz anasının yas yerində də yeməklə bağlı bəhanə edib bacımı döymüşdü. Böyük bacıma da hədə-qorxu gəlmişdi ki, "kağızım var, mənə heç nə edə bilməyəcəklər, sizi öldürəcəyəm". Bunun (təqsirləndirilən F.Qasımova işarə edir) yalandan boynunu büküb belə dayanmağına baxmayın. İstəsə işləyib daşdan pul çıxaran adamdır. Dövlət ona sosial yardım kimi 30 qoyun vermişdi dolanmaları üçün. Hadisə günü Bakıya gəlməzdən qabaq rayonda idarəyə yaxınlaşıb ki, psixoloji problemi var deyə kağız alsın".
Növbəti proses noyabrın 2-nə təyin edilib.
Xatırladaq ki, hadisə 2026-cı il yanvarın 21-də Bakıda baş verib. Belə ki, 40 yaşlı Günel Tapdıq qızı Abbasova çalışdığı marketdən çıxıb bacısının evinə gedərkən əri, 1989-cu il təvəllüdlü Firuz Akif oğlu Qasımov onun qarşısını kəsib. Əvvəlcə Günelə boşanmaq üçün məhkəməyə ərizə verməsinə görə hədə-qorxu gəlib. Qadın isə boşanacağını deyib. Bundan hiddətlənən Firuz həyat yoldaşının sinəsinə 14 bıçaq zərbəsi vurub. Qadın hadisə yerində ölüb.
Faktla bağlı cinayət işi başlanılıb, F.Qasımov Cinayət Məcəlləsinin 120.2.4 (xüsusi amansızlıq və ya ümumi təhlükəli üsulla qəsdən adam öldürmə) maddəsi ilə təqsirləndirilərək məsuliyyətə cəlb olunub.
Elgün Həsənli
