Bakı şəhəri, Nəsimi rayonu, Mirəli Qaşqay küçəsi 15 ünvanında yerləşən tikili dövlət qeydiyyatında olan yerli əhəmiyyətli memarlıq abidəsidir (3123 inventar nömrəli).
Bu barədə Oxu.Az-ın sorğusuna cavab olaraq Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətindən bildirilib.
Açıqlamada qeyd olunub ki, sözügedən məsələ ilə bağlı qurumun əməkdaşları ərazidə olublar, binanın hazırkı vəziyyəti bir daha qeydə alınıb:
"Məsələ ilə bağlı aidiyyəti dövlət orqanlarına müraciət ediləcək".
Metronun "28 May" stansiyası yaxınlığında yerləşən, eyvanı qəzalı vəziyyətdə olan bina ilə bağlı yeni detallar məlum olub.
Oxu.Az-ın əldə etdiyi məlumata görə, söhbət Nəsimi rayonu, Salatın Əsgərova küçəsi, 203 ünvanında yerləşən binanın 29 nömrəli mənzilindən gedir.
Belə ki, sözügedən bina tarixi abidədir.
Mənzilin sahibi Kamal Fərəc oğlu Hacıyev məsələ bağlı Oxu.Az-a danışıb.
O qeyd edib ki, eyvanın qəzalı vəziyyətə düşməsi ilə bağlı aidiyyəti qurumlara dəfələrlə müraciət etsə də, problem həllini tapmayıb:
"Bu məsələ metropolitenin ərazidə təmir işləri apardığı dövrdən sonra yaranıb. Həmin vaxt binanın fasadına müdaxilə olunub, eyvanın üzərində əlavə metal konstruksiyalar quraşdırılıb. Daha sonra həmin konstruksiyalar söküləndə eyvan qəzalı vəziyyətə düşdü.
Mən bununla bağlı dəfələrlə müraciət etmişəm. Amma bina tarixi memarlıq abidəsi kimi qeydiyyatda olduğu üçün təmirə icazə verilmir. Bu səbəbdən məsələ bu günə qədər həll olunmayıb.
Mənzil mənə məxsusdur, lakin bina dövlətin balansındadır. Mən öz mənzilimdə yaşayıram və qəzalı vəziyyətdə olan eyvan da həmin mənzilə aiddir.
Məcbur qalıb məsələ ilə bağlı məhkəməyə müraciət etmişəm. Çünki həm mənim təhlükəsizliyim, həm də ətrafdan keçən insanların həyatı risk altındadır".
Məlumata görə, bina qəzalı tikintilər siyahısına daxil edilib. Rəsmi qurumlar tərəfindən bildirilib ki, təmir işləri növbəlilik prinsipi ilə aparılır və sözügedən bina üzrə cari dövrdə hər hansı iş nəzərdə tutulmayıb.
Bundan narazı qalan mənzil sahibi məsələ ilə bağlı məhkəməyə müraciət edib. O, eyvanın təmirinin cavabdeh qurumun üzərinə qoyulmasını tələb edir.
Bakı İnzibati Məhkəməsinin qərarına əsasən, iddia mümkün sayılıb və iş araşdırmaya götürülüb. Məhkəmə Nəsimi Rayon İcra Hakimiyyətinə məsələni yenidən araşdırmaq və iki ay müddətində müvafiq qərar vermək öhdəliyi qoyub.
Sənədlərdə qeyd olunur ki, sözügedən bina hələ 2008-ci ildən qəzalı hesab edilir. Buna baxmayaraq, bu günədək nə əsaslı təmir, nə də söküntü işləri aparılıb. Bildirilir ki, binanın yenidən qurulması üçün investor tapılmadığından məsələ açıq qalıb.
Qeyd edək ki, hazırda eyvanın qəzalı vəziyyətdə olması ətrafdan keçən insanlar üçün real təhlükə yaradır.
Metronun "28 May" stansiyasının yaxınlığında yerləşən binalardan birində təhlükəli vəziyyət yaranıb.
Bu barədə Oxu.Az-a daxil olan müraciətdə bildirilib.
Qeyd olunub ki, binada eyvanlardan biri konstruksiyadan aralanıb və digər eyvanlarla müqayisədə nəzərəçarpacaq dərəcədə əyilib.
Redaksiyamıza təqdim olunan görüntülərdə də eyvanın bir hissəsinin boşaldığı, konstruksiyanın isə təhlükəli şəkildə irəli doğru əyildiyi aydın görünür.
Vətəndaşların sözlərinə görə, ərazidən gün ərzində çox sayda insan keçdiyi üçün mövcud vəziyyət ciddi risk yaradır. Onlar bildirirlər ki, eyvanın hər an uçmaq ehtimalı var.
Qeyd edək ki, təqdim olunan digər kadrlarda ərazi ətrafında sıx hərəkətlilik müşahidə olunur ki, bu da potensial təhlükəni daha da artırır.
Məsələ ilə bağlı aidiyyəti quruma sorğu ünvanlanıb.
