Bakı şəhər sakini Günay Nadir qızı Məmmədova fərdi şəxsi hesabındakı pensiya kapitalının azaldığını iddia edir.
Günay Məmmədova bu barədə Oxu.Az-a danışıb.
10 ildir müəllim kimi fəaliyyət göstərən Günay Məmmədova kapitalından 500 manatın silindiyini söyləyib.
"Mənim əvvəl 19 859 manat pensiya kapitalım olub. İndi isə kapitalım 19 312 manat olub. Analıq məzuniyyətində olanda "e-sosial" tətbiqini yükləmişdim. İstəyirdim ki, məzuniyyət pulum köçürüləndə bundan xəbərdar olum. Fərdi şəxsi hesabıma da həmin ərəfədə baxmışdım, bu zaman ekran görüntüsünü götürüb yoldaşa da göndərmişdim. Yoxsa sübut edə bilməzdim ki, fərdi şəxsi hesabımda bu qədər pul var. Bir neçə gün əvvəl yenə tətbiqə giriş etdim. Bu dəfə gördüm ki, kapitalda 500 manat məbləğində azalma var. Fikirləşdim ki, uşaq üçün verilən birdəfəlik 500 manat ödənişə görə azalma olub. Lakin bu ödəniş işsiz olan şəxslərin uşağı doğulduqda da verilir. Mənə maraqlı gəldi ki, bu halda necə olur ki, mənim kapitalım silinir? Mühasibata bunun səbəbini öyrənmək üçün müraciət etsəm də, səbəbini izah etməyiblər".
Məsələ ilə bağlı Dövlət Sosial Müdafiə Fondundan Oxu.Az-ın sorğusuna cavab olaraq bildirilib ki, dəqiqləşdirilmiş hesabat təqdim edən zaman sığortaedənlər tərəfindən sığortaolunanların gəlirlərində dəyişiklik olunur, sözügedən şəxsin fərdi şəxsi hesabında kapitalının azalması bununla əlaqədardır:
"Qanunvericiliyə görə, hesabatlarda sığortaolunanlara dair təqdim edilmiş fərdi uçot məlumatlarında aşkar edilmiş səhvlərin aradan qaldırılması məqsədilə sığortaedənlərin dəqiqləşdirilmiş hesabatlar təqdim etmək hüququ var.
Dəqiqləşdirilmiş hesabat təqdim edən zaman sığortaedənlər tərəfindən sığortaolunanların gəlirlərində dəyişiklik olunur. Bu da bəzi hallarda kapitalın artıb-azalmasına gətirib çıxarır.
Günay Nadir qızı Məmmədovanın fərdi şəxsi hesabında kapitalının azalması da bununla əlaqədardır. Belə ki, vətəndaşın sığortaedənləri tərəfindən 2017-24-cü illər ərzində müxtəlif vaxtlarda müəyyən dövrlər üzrə çoxlu sayda təqdim edilmiş dəqiqləşdirilmiş hesabatlarda artım və azalma onun pensiya kapitalına təsir edib.
Qanunvericiliyə görə, sığortaolunanların fərdi şəxsi hesabına daxil edilməli olan məlumatların tam və düzgün təqdim edilməsi sığortaedənin vəzifəsidir. Odur ki, sığortaolunanlar bu cür hallarda sığortaedənlərə müraciət etməlidirlər.
Günay Məmmədovaya hamiləliyə və doğuma görə müavinətin ödənilməsi məsələsinə gəlincə, vətəndaşın sığortaedəni elektron qaydada təqdim etdiyi haqq-hesab cədvəlində uyğunsuzluğa yol verib. Bu səbəbdən də sənəd icra olunmadan geri qaytarılıb. DSMF tərəfindən vətəndaşla əlaqə saxlanılaraq qeyd olunan məsələ ilə bağlı ona ətraflı məlumat verilib".
Aygün Mirakif
