Qayınana hökmü, "Çin qozu", pulla danışan satıcılar - Novruz ərəfəsində bayram bazarlığı

"Bala, hazırda alıcılıq çox zəifdir. Qazancımız üç-beş daimi alıcımız var, onlardan gəlir. Gəlib hər gün bazarlıq edib gedirlər".

Bunu Novruz bayramı ərəfəsində bazardakı vəziyyətlə maraqlanan Oxu.Az-ın əməkdaşına satıcılardan biri deyib. Reportajı təqdim edirik:

Yaz gəlişi ilə torpağı canlandırdığı kimi, bazarda da bolluq yaradacaq düşüncəsi ilə əlimizdə mikrofon yollanırıq Bakıdakı bazarlardan birinə.

"Pul verin, danışım"

Əlimizdə mikrofon görən satıcılar bir-birinə baxıb qımışırlar. Piştaxta arxasından boylanan dayıya yaxınlaşıb meyvə-tərəvəzin qiymətini soruşmaq istəyirəm ki, üzündə fərqli ifadə ilə: "Pul ver, danışım, mən pulsuz heç kimə danışmıram", - deyib üzünü çevirir.

Ümidimizi itirmirik, əlbəttə ki, suallarımıza ürəklə cavab vermək istəyən tapılacaq.

Səməni, saxla məni

Bazarda hara baxırıq, piştaxtalar arasında Novruz bayramının simvolu olan səmənilər boy verir. Müxtəlif çeşiddə, cürbəcür bəzədilmiş, al-əlvan səmənilər insanın əhvalını bir anda gözəlləşdirir.

Piştaxtası insanı valeh edən satıcı Babək Babazadə deyir ki, səmənilərin qiyməti dekorlarına görə dəyişir:

"Lap sadə olan səmənilərimizin qiyməti iki manatdır. Dekor və ölçülərinə görə qiymətlər dəyişir. Parça, ağac budaqları ilə bəzədilmiş ortaölçülü bir səməninin qiyməti 10 manatdır. Üzərində dekoru çox olanlar isə 18 manatadır. Böyük, kənarları ağac budağı ilə dizayn olunan səmənilərimizin qiyməti isə 45-50 manat arasında dəyişir. Belə qabların içindəki səməni saraldıqda onu başqası ilə əvəz etmək mümkündür, ona görə bu qiymətədir. Kənarı hasarlanmış dizaynda olan eyniölçülü səmənilərimiz 25 manatadır. Qiymət fərqi dekor müxtəlifliyinə görə dəyişir.

Çərəzlər üçün xüsusi hazırlanmış qabları isə 40-45 manata satırıq".

"Oy, nə baha!"

Çərəz adı eşidib üz tuturuq qidalar satılan bölmələrə.

Çeşid müxtəlif, rəngarənglik yetəri qədər, satıcıların yorğun simalarında gözəl təbəssüm, gəl gör ki, alıcı çox az...

Bir piştaxtaya yarım saata ancaq bir alıcı yaxınlaşa, ya yox. O da: "Oy, nə baha", - deyərək qaçır.

Göyərti satışı ilə məşğul olan, əlindəki balaca qabla göyləri sulayan xala deyir ki, günortaya qədər gözləsələr də, məhsul alan yoxdur:

"Bala, camaat heç nə almaq istəmir. Baxıb gedirlər. Daimi alış-veriş edən alıcılarımız kimdirsə, elə qazancımız da onlardan gəlir. Biz də onlar üçün buradayıq".

"Üzüsulu kartof"

Bazarı başına götürən tərəvəz ətri bizi dağ kimi qalaqlanmış piştaxtalara tərəf çəkir.

Satıcı alıcı qıtlığından gileylənir:

"Pomidor, xiyar, badımcan - kartofdan başqa, bütün hamısının bir kiloqramı 5 manatadır. Başqaları 7-8 manata satır. Biz özümüz gətiririk deyə qiyməti münasib qoymuşuq. Kartofun kiloqramı 1 manat 20 qəpiyədir. Kartofu Tovuzdan, pomidorları isə Bakı və Şəmkirdən gətiririk. Alıcılıq o qədər də yaxşı deyil. Eybi yox, yenə də olana şükür, amma vəziyyət ümumiyyətlə çətindir".

Qayınana hökmü

Çərəzlər satılan piştaxtanın arxasındakı satıcıdan qiymətləri soruşuram.

"Xanım, mən danışa bilmərəm, qayınanam qoymur", - deyərək kənara keçir.

Eh, nə edim? Digər piştaxtalara yaxınlaşıram. Bizi görcək kənara keçən satıcılar çərəzləri çəkməyə icazə versələr də, üzləri düşməsin deyə özləri piştaxtanın arxasında gizlənməyi seçirlər.

Dil bilmək fənddir

Bu dəm gözümə Hindistandan ölkəmizə gəlib bazarda alış-veriş edən turistlər dəyir. Satıcının ingilis dilində danışmaq bacarığı zəif olsa da, qiymətlər barədə məlumat verməyi bacarır. Mən də qulaq şahidi oluram.

Satıcılar zarafatlarından da geri qalmırlar.

Turist xanım qiymətdə endirim tələb edir, satıcı isə: "Çin qozudur, alın", - deyərək hindistanlı turistləri güldürür.