Paytaxtda və bir sıra bölgələrdə smart-kart tipli sayğacdan istifadə edən vətəndaşlar ciddi problemlə üzləşiblər. Dünəndən başlayan problem hələ də öz həllini tapmayıb.
Belə ki, ödəniş terminallarında karta vəsait yüklədikdə məbləğ balansda əksini tapmır. Məsələ ilə bağlı vətəndaşlar Baku TV-nin qaynar xəttinə müraciət ediblər.
Vətəndaşlardan biri bildirib ki, qaz idarəsinə müraciət edən zaman "bu gün iş günü deyil" cavabını alıb: "Deməli, biz birinci günə qədər qazsız qalmalıyıq? Telefonda mənə dedi ki, mənim iş günüm deyil, mən oraya gəlsəm, mənim hörmətimi edəcəksən?"
Digər şikayətçi isə qeyd edib ki, dünəndən evlərində qaz kəsilib: "Ötən gün saat 4-5 radələrindən kartda pul qurtardığına görə terminallardan yükləmə etmək istəyirik, yazılır ki, "abonent məlumatları tapılmayıb". Bizə deyirlər ki, iki saatdan sonra düzələcək, dünən də eyni vədi verdilər. Şaxtalı havada hamının ailəsi, uşağı onun-bunun qapısındadır".
"Evdə anam 40 dərəcə qızdırma ilə yanır, körpə uşaq da onun kimi. Evdə qaz yox, işıqlar sönür-yanır. Kimə deyək dərdimizi?" - deyə daha bir şəxs vurğulayıb.
Yeni ilin ilk günlərindən bəzi ərazilərdə yaşayan vətəndaşlar bu problemlə qarşı-qarşıyadırlar. İstirahət günlərində gücləndirilmiş iş rejimində işləməli olan "Azəriqaz"ın əməkdaşları isə, görünür, özləri istirahətdən qalmayıb vətəndaşları çətin vəziyyətdə qoyublar.
Yanvarın 1-dən smart-kart tipli qaz sayğaclarında balansın artırılması ilə bağlı müəyyən çətinliklər yaşanır.
Oxu.Az-a şikayət ünvanlayan sakinlərin sözlərinə görə, hazırda bütün ödəniş terminallarında karta vəsait yüklədikdə məbləğ balansda əksini tapmır.
Həmçinin terminalda "smart-kartın bərpası" funksiyası aktivləşdirildikdə ödənişin balansa köçürüldüyü barədə bildiriş verilsə də, həmin məbləği sayğaca yükləmək mümkün olmur.
Mövzu ilə bağlı "Azəriqaz" İstehsalat Birliyinin mətbuat katibi Eldəniz Vəliyev Oxu.Az-a açıqlamasında bildirib ki, hazırda karta yüklənən məbləğlərin sistemə ötürülməsində problem yaşanır.
Onun sözlərinə görə, bu il yanvarın 1-dən smart-kart tipli bəzi qaz sayğaclarının ödəniş sistemində yaranmış problem elə həmin gün saat 20:00-da aradan qaldırılsa da, şəbəkə kütləvi əməliyyatlar aparılması zamanı təkrar xətalarla üzləşib:
"Hazırda sistemdə müvəqqəti problem yaşanır. Köçürülən məbləğləri sayğaca yükləmək mümkün deyil. Problem qısa müddətdə həllini tapacaq və sistem düzəldikdə yüklənən məbləğlərin hər biri bərpa olunacaq. Yüklənən məbləğlərin itirilməsindən söhbət gedə bilməz".
Xatırladaq ki, ötən gün də sakinlər sözügedən problemlə qarşılaşdıqlarını bildirmişdilər.
