"Yağışdan sonra belə proseslərin baş verməsi normal haldır".
Bu sözləri Oxu.Az-a açıqlamasında ekoloq Amin Məmmədov deyib.
O, Qobu qəsəbəsində baş vermiş hadisənin uçqun olmadığını vurğulayıb və bunu iki gündür ölkədə davam edən güclü yağışlarla əlaqələndirib:
"Uçqun hadisəsi torpaq və qayanın böyük həcminin hündür məsafədən aşağıya sürüşməsi nəticəsində baş verir. Bu vəziyyəti isə torpaq səthinin yuyunması və aşınması kimi adlandırmaq olar. Yağışdan sonra belə proseslərin baş verməsi normaldır. Hətta rayon yerlərində az yağışdan sonra da belə hallar qeydə alınır.
İnsanların bu kimi ərazilərdə ev tikməsi də inzibati məsələdir, çünki həmin ərazilərdə torpaq sürüşməsi və eroziya riski var. Yerli bələdiyyə və icra nümayəndələri bu kimi halları nəzərə almalı və buna icazə verilməməlidir. Çünki belə vəziyyətin üstü məhz güclü yağış və bu kimi təbiət hadisələrindən sonra açılır. Hazırda Bakının Xətai rayonunda böyük kanalizasiya kollektorunun üzərində də ev tikməyə icazə verilib və o ərazidə çökmə baş verib.
Bu kimi halları uçqun adlandırmaq düzgün olmaz, bunlar təbii proseslərdir. Evlər tikilərkən mühafizə zolaqları nəzərə alınmalı və buna uyğun tikinti həyata keçirilməlidir", - deyə mütəxəssis bildirib.
Şükufə Süleymanlı
Abşeron rayonunun Qobu qəsəbəsində sürüşmə hadisəsi baş verib.
Oxu.Az-ın məlumatına görə, bir neçə gün davam edən intensiv yağıntılardan sonra iri daş parçaları yaşayış məntəqələrinin yaxınlığına düşüb.
Nəticədə ərazidə təhlükəli vəziyyət yaranıb.
Məsələ ilə bağlı aidiyyəti quruma sorğu ünvanlanıb.
