Şənbə günü, fevralın 7-si axşam saatlarında Bakı-Sumqayıt avtomobil yolunda sürücülərin səbəbini anlaya bilmədiyi, kilometrlərlə uzanan tıxac yarandı. Üstəlik, paytaxtın Tbilisi, Moskva, Azadlıq prospektlərində, 3-cü mkr dairəsində hərəkət, demək olar ki, dayanmışdı. Doğrudur, adi günlərdə də sözügedən istiqamətdə sıxlıq müşahidə olunur və sürücülər mənzilbaşına gec çatırlar. Lakin şənbə günü belə bir vəziyyət təbii çaşqınlıq yaratdı. Sabahı gün məlum oldu ki, Azərbaycan Avtomobil Yolları Dövlət Agentliyi (AAYDA) Bakı-Sumqayıt yolunda təmir aparır. Hər kəsdə sıxlığın məhz bu səbəbdən yarandığı barədə yəqinlik hasil oldu.
Sürücülər saatlarla tıxacda qalarkən vəziyyətlə bağlı heç bir rəsmi açıqlama verilmədi. Yalnız bazar günü səhər saatlarında Baş Dövlət Yol Polisi İdarəsi (BDYPİ) məsələ ilə bağlı məlumat yaydı. Bildirildi ki, Bakı-Sumqayıt yolunun Sulutəpə dairəsi istiqamətində asfalt örtüyünün yenilənməsi ilə əlaqədar müvəqqəti təmir-bərpa işləri aparılır və həmin ərazidə nəqliyyat vasitələrinin hərəkətinə məhdudiyyət tətbiq edilib.
Məsələ də elə buradan başlayır. Yol təmir-bərpa işləri bazar günü aparılacaqdısa, AAYDA niyə səssiz qalmışdı? Halbuki belə hallarda azı bir gün öncədən ictimaiyyətə rəsmi xəbərdarlıq edilməli, nəqliyyatın hərəkəti planlaşdırılmalı və yaranacaq sıxlığın qarşısı alınmalı idi.
Bazar günü ailəsi ilə istirahətə, şəhərdən kənara getmək istəyənlər və işə tələsən sürücülər faktiki olaraq AAYDA-nın xəbərdarlıq etmədən verdiyi qərarın "girovu"na çevrildilər. İnsanların vaxtı, planları və psixoloji durumu nəzərə alınmadı. Bu isə artıq texniki çətinlik yox, açıq-aşkar idarəetmə və kommunikasiya böhranıdır.
Diqqətçəkən məqamlardan biri də odur ki, bu hadisə AAYDA-ya bir neçə gün əvvəl yeni rəhbər - Vüsal Nəsirlinin təyin olunmasından dərhal sonra baş verib. Bu fakt ictimaiyyətdə haqlı suallar doğurur: baş verənlər yeni rəhbərliyin iş stilinin göstəricisidir, yoxsa qurumun hansısa məsul şəxsi xəbərdarlıq etməyi unudub?
Peşəkar yol təsərrüfatı idarəçiliyində bu cür işlər əvvəlcədən planlaşdırılır. Təmir barədə ictimaiyyətə günlər öncə məlumat verilir, alternativ marşrutlar təqdim olunur, yol polisi ilə koordinasiya aparılır və nəqliyyatın intensivliyi mütləq nəzərə alınır. Bir çox hallarda isə belə işlər yol yükünün minimal olduğu gecə saatlarında həyata keçirilir. Sulutəpə dairəsində isə bu prinsiplərin heç biri tətbiq olunmayıb.
Baş verənlər fonunda AAYDA-nın susqunluğu vəziyyəti daha da ağırlaşdırır. Qurum tərəfindən nə sürücülərə xitabən üzrxahlıq edilib, nə də yaşanan xaosla bağlı izahat verilib. Sosial şəbəkədə yayılan çoxsaylı video və paylaşımlar narazılığın miqyasını açıq şəkildə göstərir.
Yol infrastrukturu yalnız asfalt çəkməkdən ibarət deyil. Bu sahə planlama, şəffaflıq, operativ məlumatlandırma və vətəndaşa hörmət tələb edir. Əgər bu prinsiplər gözardı edilirsə, istənilən təmir işi ictimai narazılığa və haqlı tənqidə çevrilir.
Məsələ ilə bağlı Avtomobil Yolları Dövlət Agentliyinin (AAYDA) Mətbuat Xidmətinin rəhbəri Anar Nəcəfli Oxu.Az-a açıqlamasında bildirib ki, təmir bazar günü səhər başlayıb, axşam bitib:
"Şənbə günü axşam qeyd etdiyiniz istiqamətlərdə yaranan tıxacın AAYDA-nın Bakı-Sumqayıt yolunun Sulutəpə dairəsi istiqamətində apardığı asfalt örtüyünün yenilənməsi işləri ilə heç bir bağlılığı yoxdur. Təmir işi üçün də iş günləri deyil, sırf hərəkətin azaldığı bazar günü, istirahət günü seçilib. Maksimum dərəcədə də çalışılıb ki, tez yekunlaşdırılsın.
Təmir müddətində əks istiqamət üzrə hərəkət təşkil edilmişdi. Yol hərəkətinin təhlükəsizliyi ilə bağlı yol polisi ilə birgə işlər görüldü".
Hərəkət iştirakçılarının əvvəlcədən məlumatlandırılmaması barədə sualımıza cavab olaraq isə A.Nəcəfli qeyd edib ki, bütün müvafiq instansiyalara bu barədə məlumat göndərilib.
Məlik Məlikov, Əzizə İsmayılova
